شارەوانی سلێمانی رایگەیاند، پێویستە خاوەنی خانووە زیادەڕۆکان تاکو ٩ی ئەیلولی ٢٠٢٢ مامەڵەکانیان پێشکەش بکەن.

سەرۆکایەتی شارەوانی سلێمانی لە راگەیەندراوێکیدا ئاماژەی بەوەکردووە:" ئاگاداری سەرجەم خاوەن خانووە زیادەڕۆیی و بێ تاپۆكان دەکەینەوە کە فۆڕمن یان بێ فۆڕمن و لەناو حەرەمی گوند, یان لە دەرەوەی حەرەمی گوند دروستکراون، سەر بە شارەوانیی ناوەندن یا دەكەونە سنوری هەر پێنج بەڕێوەبەرایەتییەكانی شارەوانیمان، كە دەكەونە ناو ماستەر پلانی سلێمانییەوە و هاودژنین لەگەل نەخشەی بنەڕەتیی، پێویستە بە زووترین كات داواكاریی پێشكەش بكەن ".

ئەوەشی خستووەتەڕوو:" پێویستە خاوەنی ئەو خانووانە تاکو ٩ی ئەیلولی ٢٠٢٢ سەردانی بەشی کاروباری یاسایی سەر بە پارێزگای سلێمانی بکەن، بۆ ئەوەی مامەڵەی یاساییان بۆ بكرێت ".

شارەوانی سلێمانی روونیشیکردووەتەوە:" لە بەدەنگەوە نەهاتنی ئەم ئاگادارییەمان خاوەن موڵك خۆی بەرپرسیار دەبێت بەرانبەر یاسا ".