بەیانی ئەمڕۆ، لە رووداوێکی هاتوچۆدا لەسەر رێگای موسڵ حەوت سەربازی سوپای عێراق بوون بە قوربانی کە پێنجیان گیانیان لەدەستداوە.
بەیانی ئەمڕۆ سێشەممە، شانەی راگەیاندنی ئەمنی عێراق لە بەیاننامەیەکدا رایگەیاند:"لە رووداوێکی هاتوچۆدا لە جۆری پێکدادان لەسەر رێگای موسڵ-بەغدا لە نزیک ناحیەی قەیارە پێنج سەرباز گیانیان لەدەستدا".
ئاماژەی بەوەشداوە:" ئەو سەربازانە لە سنووری ئۆپەراسیۆنەکانی رۆژئاوای موسڵ ئێشکگر بوون، بەهۆی رووداوەکەوە پێنجیان گیانیان لەدەستداوە و دووی دیکەش برینداربوون".
لای خۆشیەوە، وەزارەتی بەرگری عێراق راگەیەندراوێکی لەبارەی رووداوەکە بڵاوکردەوە و رایگەیاند کە دوو کەسیان برینداربوون.