بەهۆی تەقینەوەیەکی خۆکوژییەوە کە لە یەکێک لە مزگەوتەکانی پاکستان روویدا، ٧٢ کەس کوژران و بریندار بوون.
میدیاکانی پاکستان بڵاویانکردەوە:" لە ئەنجامی تەقینەوەیەکی خۆکوژی لە یەکێک لە مزگەوتەکانی شاری پیشاوەر لە ناوەندی ویلایەتی خەیبەرپەختونخوا ٧٢ کەس کوژران و بریندار بوون".
ئاماژەیان بەوەشکرد:" هێرشەکە لە کاتی بەڕێوەچوونی نوێژی نیوەڕۆ لە مزگەوتەکە روویداوە، بەگوێرەی ئەو گرتە و ڤیدیۆیانەش کە لە تۆڕەکۆمەڵایەتییەکان بڵاوکراونەتەوە، بەشێکی بنمیچی مزگەوتەکە بەهۆی تەقینەوەکەوە رووخاوە".
باسیانلەوەشکرد:" دوابەدوای رووداوەکە تیمە پەیوەندیدارەکان گەیشتوونەتە شوێنی رووداوەکە و سەرجەم بریندارەکان گواستراونەتەوە بۆ نەخۆشخانە، بارودۆخی ١٣ لە بریندارەکانیش ناجێگیرە".
شایەنی باسە تاوەکو ئێستا هیچ لایەن و رێکخراوێکی تیرۆرستی بەرپرسیارێتی خۆی لە هێرشەکە رانەگەیاندووە و بەگوێرەی زانیارییەکانیش، دوابەدوای تەقینەوەکەش دەنگی تەقەیەکی زۆر لە شوێنی رووداوەکە بیستراوە.