دادگای فیدراڵی سکاڵایەکی سەبارەت بە ناردنی ٤٠٠ ملیار دینارەکە بۆ هەرێمی کوردستان بەشێوەی قەرز رەتکردەوە، کە لەلایەن ئەندامێکی لیژنەی دارایی پەرلەمانی عێراقەوە تۆمارکرابوو.

دادگای فیدراڵی عێراق لە راگەیەندراوێکدا بڵاویکردووەتەوە:" ئەمڕۆ چوارشەممە، دادگای فیدراڵی عێراق لە دانیشتنێکیدا سکاڵاکەی مستەفا سەنەد، ئەندامی لیژنەی دارایی پەرلەمانی عێراقی سەبارەت بە ناردنی ٤٠٠ ملیار دینارەکە بۆ هەرێمی کوردستان بەشێوەی قەرز رەتکردەوە".

ئەوەشی خستووەتەڕوو:" ئەو ئەندام پەرلەمانەی عێراق لە سکاڵاکەیدا، ناردنی ٤٠٠ ملیار دینارەکەی بۆ هەرێمی کوردستان بە نادەستووری لەقەڵەمداوە و داوای گرتنەبەری رێککاری یاسایی پێویستی لەوبارەیەوە کردووە".

ئەمەش لەدوای ئەوەدێت، رۆژی ١٣ی ئازار، وەزارەتی دارایی و ئابووری حکومەتی عێراق بە بڕیارێک ٤٠٠ ملیار دیناری لە رێگەی بانکی بازرگانی هەرێمەوە خستەسەر هەژماری بانکی وەزارەتی دارایی و ئابووری حکومەتی هەرێم.