بە وتەی وتەبێژی وەزارەتی دەرەوەی ئێران، سبەی باڵیۆزخانەی ئەو وڵاتە لە شاری ریازی پایتەختی سعودییە دەکرێتەوە.
ناسڕ کەنعانی وتەبێژی وەزارەتی دەرەوەی ئێران لە کۆنگرەیەکی رۆژنامەوانیدا رایگەیاند:" سبەی سێشەممە، باڵیۆزی وڵاتەکەمان لە ریازی پایتەختی سعودییە دەکرێتەوە".
ئاماژەی بەوەشکرد:" جگە لە باڵیۆزخانەکەمان، لە شاری جددەی سعودییەس کونسوڵخانەی گشتی کۆماری ئیسلامی ئێران دەکرێتەوە لەپێناو ئاسانکاریکردن بۆ کاروباری حاجییە ئێرانییەکان".
لە سەرەتای مانگی ئازاری ئەمساڵ، بە نێوەندگیری چین ئێران و سعودییە رێککەوتن لەسەرئەوەی پەیوەندییە دوو قۆڵییەکانی نێوانیان دەستپێبکەنەوە، دواتریش وەزیرانی دەرەوەی هەردوو وڵات لە کۆبوونەوەیەکدا جەختیان لە رێککەوتنی نێوانیان و کردنەوەی باڵیۆزخانەکانیان لە وڵاتی یەکدی کردەوە.
حەوت ساڵ پێش ئێستا لە سێدارەدانی ئەبونەمر لەلایەن سعودییەوە کە کەسایەتییەکی دیاری شیعە مەزهەب بوو، لە ئێران ناڕەزایەتی لێکەوتەوە و خۆپیشاندانی هاوڵاتییانی وڵاتەکە دەستپێکرد.
دوای دەستپێکردنی خۆپیشاندانەکان، خۆپیشاندەران هەڵیانکوتایە سەر باڵیۆزخانەی سعودییە لە تاران و ئەمەش ریازی نیگەران کرد، بەوهۆیەشەوە سەرجەم پەیوەندییەکانی نێوا ئەو دوو وڵاتە راگیرابوون.