کەناڵی جەزیرە لە ڕاپۆرتێکی نوێدا بڵاوی کردووەتەوە کە تاران سەرقاڵی هەوڵدانە بۆ بەهێزکردنی هێزی ئاسمانیی خۆی، بە ئامانجی بەرەنگاربوونەوەی هێزی ئاسمانیی ئیسرائیل. سێ مۆدێل وەک ئەگەری کڕین ناویان هاتووە:

1- میگ-٢٩م (MiG-29M) لە ڕووسیا.

2- چێنگدوو جەی-10سی (Chengdu J-10C) لە چین.

3- سوخۆی سو-35 (Sukhoi Su-35) لە ڕووسیا.

لە کاتێکدا هەندێک سەرچاوە باس لە گەیشتنی میگ-29 دەکەن و دەڵێن سو-35یش لە بەرنامەیاندایە، بەڵام گەیاندنی فەرمی سو-35 لەلایەن مۆسکۆوە هێشتا پشتڕاست نەکراوەتەوە.

وردەکاریی فڕۆکەکان

ئەم سێ فڕۆکەیە دەتوانن بە شێوەی جیاواز مەودای تەکنیکی ئێران و ئیسرائیل کەم بکەنەوە، کە ئیسرائیل لە ئێستادا پشت بە فڕۆکەکانی وەک F-15 و F-16 دەبەستێت.

1. میگ-29م (MiG-29M): گونجاوە بۆ شەڕی نزیک و ڕاوکردنی درۆنی ئیسرائیل. خێراییەکەی نزیکەی 2.3 ماخ-ە، بزوێنەری بەهێزکراوی هەیە. بەڵام لە شەڕی دوورمەودا لە جەی-10 سی و سو-35 دواکەوتووەترە.

2. جەی-10 سی (J-10C): فڕۆکەیەکی مۆدێرنی چینییە، گونجاو بۆ شەڕی دوورمەودا. گرنگترین سوودی، بوونی راداری AESA (کە توانای دۆزینەوە و تێکهەڵچوونی چەند ئامانجی لە یەک کاتدا هەیە)، سووکەڵەترە لە سو-35 و ئەلیکترۆنیاتی مۆدێرنی هەیە. دەتوانێت بۆ ئێران ببێتە بازدانێکی تەکنۆلۆجی لە شەڕی دوورمەودادا.

3. سو-35 (Su-35): بەهێزترین بژاردەیە، فڕۆکەیەکی قورسی رووسییە بۆ باڵادەستی ئاسمانی. دوو بزوێنەری بەهێزی هەیە، راداری مەودا درێژ و توانای هەڵگرتنی باری قورسی چەک هەیە. بەهۆی توانای زۆری لە مانۆڕ و هێزی راداریدا، لە رووی ئۆپەراسیۆنییەوە کاریگەرترین پلاتفۆرمە بۆ دروستکردنی هێزی رێگریکەر، هەروەها دەتوانێت هەڕەشە لەسەر فڕۆکە و سووتەمەنی گەیەنەرەکانی ئیسرائیل لە ئاسمانی سووریا و عێراق دروست بکات.

ئەگەرچی کڕینی ئەو سێ مۆدێلە، بۆ ئێران دەتوانێت توانایی و فرەچەشنیی چەکەکانی زیاد بکات و جیاوازیی تەکنیکیی کۆنی لەگەڵ ئیسرائیل کەم بکاتەوە، بەڵام پێکهاتەی ئێستای هێزی ئاسمانیی ئیسرائیل (بە تایبەت بەهۆی نوێکردنەوە بەردەوامەکان و سیستەمی شەڕی ئەلیکترۆنیی پێشکەوتوو) هێشتا ستانداردێکی زۆر بەرزی لە ناوچەکەدا هەیە، بەتایبەت بەهۆی فڕۆکەی ئێف 15 و ئێف 16.