بەئامادەبوونی شاناز ئیبراهیم ئەحمەد، خانمی یەکەمی عێراق، ئێزگەی دەنگی گەلی کوردستان لەسلێمانی خزمەتەکانی خاتوو هێرۆ ئیبراهیم ئەحمەدی لەئامێزگرت و دیارییەکی بەهاداری پێشکەش کرد.

نووسینگەی ڕاگەیاندنی خانمی یەکەم بڵاویکردەوە: لەو رێورەسمەدا کتێبی دەنگیی (بەکورتی…نوسینی هێرۆ ئیبراهیم ئەحمەد) بڵاوکرایەوە کە لە حەوت تراکی دەنگی پێکهاتوە و یەکەم بەرهەمی دەنگی ئێزگەی دەنگی گەلی کوردستانە بەهاوکاری مۆزەخانەی نیشتمانی ئەمنەسورەکە.

ئاماژەی بەوەشکردووە، باسکردنی ڕۆڵی مێژوویی خاتوو هێرۆ لەسەردەمی خەباتی شاخ و تۆمارکردنی نەبەردییەکانی پێشمەرگە و شۆڕش، دوای ڕاپەڕینیش وەک سیاسەتمەدار و نوسەرێکی بوێر و دامەزرێنەری چەندین ناوەندی گرنگی میدیایی، بەشێکی تری ئەو رێورەسمە بوو کە تێیدا مەریوان مەسعود بەڕێوەبەری ڕادیۆی دەنگی گەلی کوردستان، بڵاوکردنەوەی ئەم کتێبە دەنگییەی بەهەنگاوێکی گرنگ وەسفکرد لەپێناو پاراستنی میراتی ئەدەبی و ئەرشیڤکردنی نووسینەکاندا.

دواتر یەکەمین کۆپی کتێبە دەنگییەکە پێشکەشی خاتوو هێرۆ ئیبراهیم ئەحمەد و خاتوو شاناز ئیبراهیم ئەحمەد کرا.

کتێبی دەنگیی (بەکورتی… نوسینی هێرۆ ئیبراهیم ئەحمەد) سەرەتا لەڕێگەی فڵاش میمۆری، دواتر لەکەناڵی یوتیوبی ڕادیۆکە، و لەقۆناغی سێیەمیشدا بە شێوەی زنجیرە و ئەڵقەی دەنگی لە شەپۆلەکانی ڕادیۆی دەنگی گەلی کوردستانەوە پەخش دەکرێت.