غەززە و غەزا غەزەل بۆ قودسەکەی خۆم

تا قودسی خۆم وەستا بێ ، قودسی وانم بۆ چییە؟
نوێژ لە ئەقسا بۆ بکەم ؟ ھەڵەبجەم عەیبی نییە
رەحیماوا حەی ئەندەلوس،  جا  ئەندەلوسم بۆ چەس
غەرناتەم ناوی تەعریب، قورتبەم قەت بیر نییە

 شۆرجەم حەیقودسە خۆ ، قودسی ئەولا بوو ھەرەس
من فەلەستینم لە چی ؟ لای خۆیان بۆتە ھەوەس
تەعریبی نوێ لەکەرکوک ، تا مەککە ھاوارێتی
یومی قودس لە پای چی ؟ ھەموو رۆژێکم تەرەس

 ئۆرشەلیم فرۆشراوە ، پارچە پارچە و دەس بە دەس
سەفقەی سەدە،  مەعلومە  ، بە مستەریان گۆتییە: یەس
کەس خەم لە دەردم ناخوا ، بۆ من نەبونەتە کەس
دنەی فەقیر بۆ بدەم ؟ ھەقمانە بێژین : دی بەس
فیقھی ئەولەویاتە ، بۆ کوردستان و ھەم بۆ دین 
خانەقین ئەقسای منە ، کەرکوک شایانی جەنگین
بۆ کورد غەزای پێ دەکەم ، سوپاکەی سەلاحەدین
تا ماڵ مابێ حەرامە ، نوێژی مزگەوتی حەتین