سەبارەت بەو هێرشەی درەنگانی شەوی رابردوو كرایە سەر بنكەی سەربازی كالسۆ لە باكووری پارێزگای بابل شانەی راگەیاندنی ئەمنیی عێراق، روونكردنەوەیەكی بڵاوكردەوە.
شانەی راگەیاندنی ئەمنی عێراق لە روونكردنەوەیەكدا بڵاویكردەوە:" كاتژمێر 01:00ـی بەرەبەیانی ئەمڕۆ شەممە، تەقینەوەیەك لە نێو بنكەی سەربازی كالسۆ-ی تایبەت بە حەشدی شەعبی لە باكووری پارێزگای بابل روویدا، بەهۆشییەوە یەك ئەندامێكی حەشدی شەعبی كوژراو و هەشت كەسیش دیكەش برینداربوون".
تیمی لێكۆڵینەوەی سەر بە بەرگری شارستانی و لایەنە پەیوەندیدارەكانی بۆ هۆكاری ئەو تەقینەوەیە پێكهێندران
باسی لەوەشكردووە:" بە هەوڵ و كۆششی تیمەكانی بەرگریی شارستانیی بابل تواندراوە ئەو ئاگرەی بەهۆی تەقینەوەكەوە دروستبوو كۆنترۆڵبكرێت و تیمی لێكۆڵینەوەی سەر بە بەرگری شارستانی و لایەنە پەیوەندیدارەكانی بۆ هۆكاری ئەو تەقینەوەیە پێكهێندران".
بەهیچ شێوەیەك ئەو بنكەیە نەكراوەتە ئامانج
روونیشیكردەوە:" بەهیچ شێوەیەك ئەو بنكەیە نەكراوەتە ئامانج و تیمەكانی لێكۆڵینەوەش بۆ مەبەستی ئاشكراكردنی هۆیكاری سەرەكی تەقینەوەكە و ئاگركەوتنەوەكە لێكۆڵینەوەكانیان دەستپێكردووە".