ئەندامێکی ئەنجومەنی نوێنەران رایگەیاند، دەبێت مووچەی فەرمانبەرانی
هەرێم لە بانکێکی فیدراڵی جێگیربکرێت.
موسەننا ئەمین ئەندامی ئەنجومەنی نوێنەرانی عێراق لە
کۆنگرەیەکی رۆژنامەوانیدا رایگەیاد:" رۆژی پێنجشەممەی رابردوو لەگەڵ جاسم عومەیری
سەرۆکی دادگای فیدراڵی لەپێناو دوو ئامانجی سەرەکی کۆبووینەوە".
ئاماژەی بەوەشکرد:" بە سەرۆکی دادگای فیدراڵیم وت،
ئەگەر نوێژەکانی بکات و تاوانی گەورە ئەنجام نەدات دەچێتە بەهەشتەوە چونکە دڵی
خەڵکی هەرێمی زۆر خۆشکردووە".
باسی لەوەشکرد:" یەکێک لە ئامانجەکانی
کۆبوونەوەکەمان زیندانیانی سیاسی و خانەنشینان و پلەبەرزکردنەوەی فەرمانبەران بوو،
بە ناوبراومان راگەیاند، کە داواکاریمان هەیە ئەو کەیسانەش بگەیندرێنە ئەنجام،
سەرۆکی دادگای فیدراڵیش وتی، هاوڵاتییانی هەرێم لای ئەوان لەپێشینەن و ئامانجیان
سوودمەندبوونی خەڵکی هەرێمی کوردستانە".
موسەننا ئەمین وتیشی:" سەرۆکی دادگای فیدراڵی
داوایکرد جارێکی دیکە کۆبینەوە و باس لە پلەبەرزکردنەوە و وارسی شەهیدان و چەند
بابەتێکی دیکەی بکەین، ئەگەر پێویستی بە سکاڵا بوو سکاڵاش تۆمار دەکەینەوە".
روونیشیکردەوە:" بابەتی یەکلاییکردنەوەی سێ مووچە
نەدراوەکەی ساڵی رابردوو لە تایبەتمەندی کارەکانی دادگای فیدراڵی نییە، هەروەها
دەبێت مووچەی هاوڵاتییان لە بانکێکی فیدراڵی جێگیربکرێت".