وتەبێژی وەزارەتی کارەبا رایگەیاند، ئەگەر هەناردەی گاز بۆ وێستگەکانی کارەبا دەستپێبکاتەوە، لە کەمتر لە 24 کاتژمێردا بارودۆخی کارەبا ئاسایی دەبێتەوە.

ئومێد ئەحمەد، وتەبێژی وەزارەتی کارەبای حکومەتی هەرێمی کوردستان ئاماژەی بەوەکرد:" هەوڵەکان چڕکراونەتەوە بۆ ئەوەی لە رووی تەکنیکییەوە هەناردەی گاز لە کێڵگەی کۆمۆڕ ئاسایی بکرێتەوە ".

توانرا سیستەمی کارەبا لە کوژانەوەی گشتی بپارێزرێت

ئەوەشی خستەڕوو، بە هەوڵ و ڕێنمایی و پاڵپشتیی وەزیری کارەبا توانرا لەکاتی هێرشە درۆنییەکە سیستەمی کارەبا لە کوژانەوەی گشتی بپارێزرێت و وێستگە و محاویلەکانی کارەبا لە سوتان و تێکچوون بپارێزرێت.

وتەبێژی وەزارەتی کارەبا راشیگەیاند، وەزارەتی کشتوکاڵ و سەرچاوەکانی ئاو هاوکار بوون لە بەردانەوەی ئاو لە هەردوو وێستگەی دووکان و دەربەندیخان و کارپێکردنی یەکەکانی کارۆئاوی.