بڕیارە ئەمڕۆ سەرۆک وەزیرانی
عێراق سەردانی شاری هەولێر بکات و لەگەڵ بەرپرسانی هەرێم کۆببێتەوە.
میدیای پارتی دیموکراتی
کوردستان بڵاویکردەوە:" ئەمڕۆ پێنجشەممە، محەمەد شیاع سودانی سەرۆک وەزیرانی
عێراق بە سەرۆکایەتی شاندێکی حکومەتی وڵاتەکەی، دەگاتە هەولێری پایتەختی هەرێمی
کوردستان".
ئاماژەی بەوەشکرد:"
لە سەردانەکەی ئەمڕۆیدا، سودانی لەگەڵ بەرپرسانی هەرێم تاوتوێی کێشە هەڵپەسێردراوەکان
بە گشتی و کێشە داراییەکان بە تایبەت دەکات".
سەردانەکەی سودانی بۆ
هەولێر لە کاتێکدایە، حکومەتی هەرێمی کوردستان ئاماژە بەوەدەکات، بەهۆی ئەوەی بەغدا
بڕی پێویست پارەی نەناردووە ناتوانێت مووچەی مانگی رابردوو دابەشبکات و ئەمەش
ناڕەزایەتییەکی زۆری هاوڵاتییانی لێکەوتووتەوە.
لەلایەکی دیکەوە دادگای
فیدراڵی بڕیاریداوە مووچەی فەرمانبەرانی هەرێم راستەوخۆ لە رێگەی بانکەکانی
عێراقەوە بدرێت و بەوهۆیەشەوە وەزارەتی دارایی عێراق داوا دەکات هەژماری بانکی بۆ
فەرمانبەرانی هەرێم دروستبکرێت، لە بەرامبەریشدا حکومەتی هەرێم کار لەسەر پڕۆسەی دروستکردنی
(هەژماری من) دەکات بۆ مووچەخۆرانی هەرێم.