خانمی یەکەمی عێراق
رایگەیاند، خانمانی رۆژنامەنووس دەرفەتی باشیان لەبەردەمدایە و توانیویانە بەربەستەكان
بشكێنن و كاراكتەرێكی كارامە بن لە تێكڕای دەزگا میدییاییەکاندا.
ئێوارەى رۆژى
چوارشەممە، شاناز ئیبراهیم ئەحمەد، خانمی یەکەمی عێراق لەشارى سلێمانی لەگەڵ ژمارەیەک
لەخانمانی راگەیاندنکار کۆبۆوە و دۆخی ژنان لەبوارى میدیا و شێوازی مامەڵەکردن لەدامەزراوەکاندا
تاوتوێ کرا.
شاناز ئیبراهیم
ئەحمەد ئاماژەی بەوەکرد:" بەخۆشحاڵییەوە رێژەى ژنان لەدامەزراوە میدیاییەکاندا
بەرەو زیادبوونەو ئێستا خانمانی رۆژنامەنووس دەرفەتی باشیان لەبەردەمدایە و توانیویانە
بەربەستەكان بشكێنن و كاراكتەرێكی كارامە بن لە تێكڕای میدیا بیسترا و بینراو و
نووسراوەكان، هەروەها لە بەدواداچوون و تۆماركردن و گواستنەوەی زانیارییەكان رۆڵێكی
ئەرێنییان هەبێت ".
ئەوەشی خستەڕوو:" خانمە میدیاکارەکان چ بێژەر بن یان کارمەندی
ناو دامەزراوەکە یاخود پەیامنێرەکان، پێویستیان بەوەیە کەپشتگیری و پشتیوانی بکرێن
بەپاڵنەرێکی نیشتمانی تا سود لەتواناکانیان وەربگیرێت و ئەو کۆسپ و تەگەرانە وەلابنرێت
کەرێگرە لەپێشکەوتنیان لەکایەى میدیاییدا، هاوکات کاربکرێت بۆ پێدانی رۆڵ و مافەکانیان
شان بەشانی پیاوان لەدەزگا و دامەزراوەکاندا ".
خانمی یەکەمی عێراق
وتیشی:" خانمان لەبوارى میدیادا زۆر ماندوون و هەندێکیان رووبەرووى کێشە و
گرفت دەبنەوە، دەبێ کاربکەین تا هاوکاریان بین و پشتگیری و پشتیوانیان بین ".
لە درێژەی
قسەکانیدا بە خانمانی رۆژنامەنوسانی وت:" ئێوە نوێنەرى دامەزراوەى میدیایی جیاجیان،
بەڵام من بەچاوی جیاوازییەوە سەیرتان ناکەم و سەربەرزی و سەرکەوتنی هەمووتانم دەوێ،
چونکە دەبێ ژنان پشت و پەناى یەکتر بن ".
بە پێی
راگەیەندراوەکە، هەر لەکۆبوونەوەکەدا خانمانی میدیاکار سەرنج و بۆچوونەکانی خۆیان
خستەروو هاوکات تیشکیان خستەسەر ئەو گرفت و ئاستەنگانەى لەکارى رۆژانەیاندا رووبەرووى
دەبنەوە و ئاماژەیان بەوەکرد لەرێى کارکردنەوە دەیانەوێ بیسەلمێنن کەتواناکانیان لەتواناى
پیاوانی هاوپیشەیان کەمتر نییە، سەربارى ئەوەى ئەرکی دایکایەتی و خێزانیان لەئەستۆیە.
خانمی یەکەم
شاناز ئیبراهیم ئەحمەد جەختیکردەوە کە بۆ کەمکردنەوەى بۆشایی نێوان پیاو و ژن لەکایەى
میدیاییدا، پێویستە دامەزراوەیەکی هاوشێوەى رێکخراوەکانی ژنان پێک بێت کەخانمانی میدیاکاری
هەموو دامەزراوەکانى راگەیاندن لەخۆ بگرێت بەجیاوازی ئایدۆلۆژیاوە، دامەزراوەیەک بێت
بۆ کۆکردنەوە و داکۆکی کردن لەمافەکانی ژنانی راگەیاندنکاری نێو دەزگاکانی راگەیاندن.