میدیای فەرمی یەکێتی بڵاویکردەوە، ئەمڕۆ بافڵ جەلال تاڵەبانی سەردانی بەغدا دەکات و پێداگری دەکات لەوەی  ژیان و گوزه‌رانی خه‌ڵكی هه‌رێم هێلێ سووره‌.

ماڵپەڕی "pukmedia" لە زاری نوسینگه‌ی رۆژنامه‌وانی سه‌رۆكی یه‌كێتی بڵاویکردووەتەوە، لە میانەی‌ سه‌ردانه‌کەیدا بۆ بەغدا، بافڵ جەلال تاڵەبانی چه‌ندین كۆبوونه‌وه ‌و دیداری سیاسی گرنگی سه‌باره‌ت به‌مافه‌كانی گه‌لی كورد و مووچه‌خۆران و یه‌كخستنی هه‌وڵه‌كان بۆ چاره‌سه‌ركردنی كێشه‌كانی نێوان هه‌ولێر و به‌غدا ده‌بێت.

ئەوەشی خستەڕوو، سه‌ردانه‌كه‌ی سه‌رۆكی یەكیتی بۆ به‌غدا له‌چوارچێوه‌ی به‌رده‌وامی هه‌وڵه‌كانیدایه‌ بۆ زامنكردنی مووچه‌ی مووچه‌خۆرانی هه‌رێم و پاراستنی مافه‌كانی كۆمه‌ڵانی خه‌ڵكی كوردستان، هه‌روه‌ك سوپاسكردنی سه‌رۆك وه‌زیران و لایه‌نه‌ سیاسییه‌كانی پێكهێنه‌ری حكومه‌تی عیراق كه‌ به‌ده‌نگ داواكاری یه‌كێتیی نیشتمانیی كوردستانه‌وه‌ هاتن و هه‌ماهه‌نگ بوون بۆ چاره‌سه‌ركردنی كێشه‌كانی به‌رده‌م مووچه‌خۆرانی هه‌رێم.