سەرۆک وەزیرانی عێراق لەبارەی هێرشی میلیشیاکان بۆسەر عێراق رایگەیاند، دەبێت بڕیاری ئاشتی و جەنگ بەدەستی وڵات بێت نەک لایەنەکانی دیکە.
محەمەد شیاع سودانی، سەرۆک وەزیرانی عێراق لە نوێترین چاوپێکەوتنیدا لەگەڵ رۆژنامەی Foreign Affairs، کە چەند رۆژێک پێش سەردانەکەی بۆ ئەمەریکا ئەنجامیداوە، دەڵێت:" پەیوەندییەکانی ئەمەریکا و عێراق فاکتەرێکی سەرەکی سەقامگیربوونی رۆژهەڵاتی ناوەڕاستە، کە لە هەمان کاتدا گەلان بەهۆیەوە دەبوژێنەوە".
ئەو گروپانە لە دۆخی ئاڵۆزدا سەریانهەڵداوە
وتیشی:" لە ساڵانی دواییدا ماوە ماوە گرژی و ئاڵۆزی لە ئەنجامی ململانێکان لەگەڵ گروپە چەکدارەکانی عێراق، لە نێوان وڵاتەکەماندا درووستبوون، کە ئەو گروپانە لە دۆخی ئاڵۆزدا و لە کاتی رووبەرووبوونەوەی تیرۆردا سەریانهەڵداوە".
بێوچان کار بۆ ئاسایش و سەقامگیری دەکەین
راشیگەیاند:" بەڵام وردە وردە لەگەڵ گەڕاندنەوەی ئاسایش و سەقامگیری، پێویستبوون بە چەک و هێز لەدەرەوەی دەسەڵاتی دەوڵەت و دامەزراوەکانی بوونی نامێنێت، لە ئێستاشدا بێوچان کار بۆ ئەو ئامانجە دەکەین".
رێیەکی دوور و پڕ ئالنگاری لەپێش عێراقە
سودانی باسی لەوەش کرد:" رێیەکی دوور و پڕ ئالنگاری لەپێش عێراقە، حکومەتەکەم باش لەو دۆخە هەستیارە تێگەیشتووە و دەزانێت کە دەبێت باڵانسی نێوان ویلایەتە یەکگرتووەکان و ئەو گروپە چەکدارەکانەی کە لەگەڵ هێزەکانی ئەمەریکا دەچێتە ململانێوە، رابگرێت".
هێرشکردنە سەر بەرژەوەندییەکانی ئەمەریکا رەتدەکەینەوە
سەرۆک وەزیرانی عێراق دەشڵێت:" ئێمە هێرشکردنە سەر بەرژەوەندییەکانی ئەمەریکا لە عێراق و وڵاتانی دراوسێش رەتدەکەینەوە، لە هەمان کاتدا پێویستمان بە کارە بۆ چارەسەرکردنی ئاڵۆزییەکانی ناوخۆ و گەیشتن بە لێکتێگەیشتنی سیاسی لەگەڵ لایەنە جیاوازەکان".
بڕیاری جەنگ و ئاشتی تایبەت بە دەوڵەت بێت
هەروەها وتیشی:" دەبێت بڕیاری جەنگ و ئاشتی تایبەت بە دەوڵەت بێت، نابێت هیچ لایەنێکی دیکە داوای ئەو مافە بکات".