بەڕێوەبەرایەتی چاکسازی گەورانی هەولێر روونکردنەوە لەبارەی گیان لەدەستدانی زیندانیکراوێک دەدات و دەڵێت " نەخۆشی شەکرەی هەبووە ".

بەڕێوەبەرایەتی چاکسازی گەورانی هەولێر لە روونکردنەوەیەکدا ئاماژەی بەوەکرد، زیندانیکراوێک بەناوی ئەسعەد حسێن ئەحمەد کە نەخۆشی شەکرەی هەبوو و کاریگەری لەسەر گورچیلەکانی دروستکردبوو، بەهۆیەوە گیانی لەدەستدا.

ژیان و مردن لە دەست خودایە

ئەوەشی خستەڕوو:" پێش گیان لەدەستدانی ئەو زیندانیکراوە لە ڕێگەی تیمەکانمانەوە هەفتانە دووجار ڕەوانەی نەخۆشخانە دەکرا و شتنی گورچیلەی بۆ ئەنجامدەدرا و هەموو خزمەتگوزارییەکی تەندروستی بە باشترین شێواز پێشکەشکراوە، بەڵام ژیان و مردنیش لە دەست خودایە ".

ماوەی 22 ساڵە لە چاکسازییە

لەبارەی ئەو سزای ئەو زیندانیکراوەش، چاکسازی گەورانی هەولێر دەڵێت، ناوبراو ماوەی 22 ساڵە لە چاکسازییە و بە هەردوو ماددەی یاسایی 406 و 169 بە ماوەی سزای سێدارە و پێنج ساڵ و یەک مانگ زیندانیکردن سزادرابوو.

ئەوەشی خستەڕوو:" سەرلەبەری ئەو هەواڵەی لە هەندێک لە پەیج و دەزگای ڕاگەیاندن بڵاوکراوەتەوە دوورە لەڕاستییەوە و سکاڵای یاسایی لەسەر ئەو پەیج و دەزگایەنە تۆمار دەکەین کە ئەم هەواڵە ناڕاستەیان بە ناوی بنەماڵەی کۆچکردوو بڵاوکردووەتەوە و هەوڵی ناوزراندنی بەڕێوەبەرایەتیەکەمانیان ".