جێگری سەرۆكی ئەنجومەنی وەزیرانی حكومەتی هەرێم رایگەیاند، ئەمڕۆ لەگەڵ دەستەیەك لە نوێنەرانی كەسوكاری ئەنفال و تاقانەكانی ئەنفال كۆبۆوە و لەبارەی داواكارییەكانیان گفتوگۆی لەگەڵدا كردن.
قوباد تاڵەبانی، جێگری سەرۆكی ئەنجومەنی وەزیرانی حكومەتی هەرێم لە لێدوانێكدا لە مەزارگەی دێبنە بۆ یادی 36 ساڵەی كارەساتی شاڵاوی ئەنفال رایگەیاند:" ئێمە ساڵانی رابردوو قسەی زۆرمان كردووە لەسەر ئەنفال، بۆیە دەبێت لەوە تێبگەین هاوڵاتیان لە قسە و لێدوان بێزاربوون".
كار لەسەر جێبەجیكردنی كرداریانەی داواكارییەكانی كەسوكاری ئەنفال دەكەین
وتیشی:" ئەمڕۆ لەگەڵ دەستەیەك لە نوێنەرانی كەسوكاری ئەنفال و تاقانەكانی ئەنفال كۆبوونەوەیەكی چەند كاتژمێریمان ئەنجامدا و باسمان لە داواكارییەكان كردوو و تەواوی داواكارییەكانیان پێشكەش كردین، بەشێكیان جێبەجێكراون و بەشێكی دیكەیان رێكاریان بۆ دەگرینەبەر".
باشترین پەیام، پەیامی كرادارییە
ئەوەشیخستەڕوو:" ئەمەی دەیكەین هەوڵی كردارییە، باشترین پەیامیش پەیامی كرادارییە و ئەمڕۆش لەگەڵ ئەم ئازیزانە كۆبوینەتەوە و هەوڵەكانمان بۆ جێبەجێكردنی داواكارییەكانیان بەردەوامی پێدەدەین".