لێپرسراوی مەڵبەندی یەکێتی
لە سلێمانی رایگەیاند، هەڵبژارد زیاد لە پێویست دواکەوتووە و پێویستە هەموو
لایەنەکان پابەند بن بەو کاتەی سەرۆکایەتی هەرێم دیاریکردووە.
زیاد جەبار، لێپرسراوی
مەڵبەندی 1ی رێکخستنی یەکێتی لە سلێمانی بە BMC راگەیاند:" پێویستە هەڵبژاردن لە کاتی
خوێدا بەڕێوەبچێت، چونکە لە ئێستادا بۆشایی یاسایی و دەستووری لە هەرێمی کوردستاندا
هەیە، لەبەر ئەوەی پەرلەمان وەک دامەزراوەیەکی یاسادانان نەماوە و حکومەتێکی
کاربەڕێکەر بوونی هەیە ".
یەکێتی ئامادەیە بۆ هەڵبژاردن
راشیگەیاند:" دواخستنی
هەڵبژاردنی پەرلەمانی کوردستان لە پەرژەوەندی خەڵك و قەوارەی هەرێمی کوردستان نییە،
بۆیە یەکێتی ئامادەیە بۆ هەڵبژاردن ".
لەبارەی ئامادەکارییەکانیان
بۆ پرۆسەکە وتی" ناوی کاندیدانمان پێشکەش بە کۆمسیۆنی هەڵبژاردنەکانی عێراق
کردووە و سەرجەم رێککارە یاساییەکان تەواوکراون ".
ئێستا زووە بۆ راگەیاندنی ناوەکان
لە وەڵامی پرسیارێکی
پەیامنێری BMC کە بۆچی تاکو ئێستا ناوی
کاندیدانیان رانەگەیاندووە، زیاد جەبار دەڵێت :" ئێستا زووە بۆ راگەیاندنی ناوەکان،
چونکە هێشتا وادەی بانگەشەی هەڵبژاردن دەستی پێنەکردووە، بۆیە پابەند دەبین بە
رێککارەکانی کۆمسیۆن بۆ بانگەشەکردن بۆ کاندیدەکان ".
سەبارەت بە کێشەکانی مووچە
و بودجەش باسی لەوەکرد:" یەکێتی زۆرترین هەوڵیداوە بۆ ئەوەی مافی خەڵکی کوردستان
لە مووچە و بودجەدا پارێزراو بێت ".
وتیشی :" ئومێد
دەکەین جارێکی دیکە پرسی مووچە نەبێتە هەواڵ و مژدە بۆ خەڵک ".
پەیامنێری BMC دەپرسێت، ئایا گۆڕانکاری لە حکومەتی خۆجێی سلێمانی دەکرێت، لێپرسراوی
مەڵبەندیش لە وەڵامدا دەڵێت :" چەند جارێک لەگەڵ قوباد تاڵەبانی، جێگری
سەرۆکوەزیران و سەرۆکی تیمی یەکێتی لە حکومەت قسەمان کردووە لەسەر ئەوەی گۆڕانکاری
لە ژمارەیەک بەڕێوەبەری یەکەی ئیداری لە پارێزگای سلێمانی بکرێت ".