ئەنجوومەنی سەركردایەتی یەكێتیی نیشتمانیی كوردستان ئەمڕۆ بە سەرپەرشتی بافڵ جەلال تاڵەبانی كۆبووەوە و جەختی لەسەر تەواوكردنی ئامادەكاری یەكێتی بۆ ئەنجامدانی هەڵبژاردنی كوردستان لە وادەی خۆی كردەوە.
سەرەتای كۆبوونەوەكە، سەرۆكی یەكێتی دوا پێشهاتەكانی دۆخی سیاسی كوردستان، عێراقی روونكردەوە و هەڵوەستەی لەسەر پێگەی روو لە گەشەكردووی یەكێتی لەسەر ئاستی كوردستان و عێراق و ناوچەكە كرد و رایگەیاند:" ئەمە بەرئەنجامی یەك گوتاری و یەك دەستی سەركردایەتی و راست و دروستی سیاسەتەكانی یەكێتییە كە بۆتە جێی ئومێدی میللەتەكەمان و پشتیوانی دۆستانی ئەزموونەكەمان".
لەلایەكی دیكەشەوە گفتوگۆی هەمەلایەنە ورد لەسەر ئامادەكارییەكانی مەكتەبی هەڵبژاردن و كاری لیژنەكان كرا و هەڵسەنگاندنی پێویستی بۆ بەرنامە و گوتاری سیاسی یەكێتی لە كەمپینی هەڵبژاردن لەسەرجەم شار و شارۆچكەكانی هەرێم ئەنجامدرا.
تەنها لە رێی هەڵبژاردنێكی پاك و بێگەرد لەوادەی خۆیدا ژیان و گوزەرانی باشتر بۆ هاوڵاتیان دەستەبەردەبێت
ئەندامانی ئەنجوومەنی سەركردایەتی بە تێر و تەسەلی بیر وڕای خۆیان خستەڕوو و ئاماژەیان بەوەشكرد:" گەشەكردنی ئەزموونی نیشتمانییمان، پاراستن و بەهێزكردنی قەوارەی هەرێمی كوردستان، دابینكردنی ژیان و گوزەرانی باشتر بۆ هاوڵاتیان تەنها لە رێی هەڵبژاردنێكی پاك و بێگەرد لەوادەی خۆیدا دێتەدی".
پەرلەمانێكی بەهێز و حكومەتێكی پتەو و خزمەتگوزار دەهێنێتە كایەوە
ئەوەشیانخستەڕوو:" پەرلەمانێكی بەهێز و حكومەتێكی پتەو و خزمەتگوزار دەهێنێتە كایەوە، ئەوەش بۆ راستگۆیی بزوتنەوەی سیاسی و داهاتووی گەلەكەشمان گرنگە، بە تایبەتی كە هەڵبژاردنی داهاتوو دەرفەتێكە تا ئاڵوگۆڕی دیموكراتیانە لە دەسەڵات و نوێبوونەوەی پرۆسەی سیاسی بكرێت".
بە یەكریزییەوە پێداگری لەسەر ئیستحقاقە دەستووری و یاسایی و نەتەوەییەكانی خۆمان دەكەین
هەروەها، لە چوارچێوەی پرۆسەی سیاسی عێراقیشدا بەسەربەرزیی و یەكریزییەوە پێداگری لەسەر ئیستحقاقە دەستووری و یاسایی و نەتەوەییەكانی خۆمان بكەین.