جێگری سەرۆک وەزیرانی هەرێم پەیامێکی بەبۆنەی رۆژی رۆژنامەگەریی کوردی
و یادی 126 ساڵەی دەرچوونی یەکەمین رۆژنامەی کوردییەوە بڵاوکردەوە.
قوباد تاڵەبانی جێگری
سەرۆک وەزیرانی هەرێم رایگەیان:" رۆژی
رۆژنامەگەریی کوردی و یادی 126 ساڵەی دەرچوونی یەکەمین رۆژنامەی کوردی لە هەموو
رۆژنامەنووسان و میدیاکارانی کوردستان پیرۆزبێت".
یاساکانی کاری رۆژنامەگەری و مافی دەستخستنی زانیاری وەک خۆی جێبەجێ بکات
ئاماژەی بەوەشکرد:" لەم یادەدا و لە بڕوای تەواومەوە بە ئازادی
رۆژنامەوانی و سەرجەم ئازادییەکانی تر، داواکارم هەم ئێمەی لە دەسەڵات و لایەنە
سیاسییەکان و هەم خودی کەناڵەکانی راگەیاندن و رۆژنامەنووسان بە دیدێکی
رەخنەگرانەوە دۆخی ئێستای رۆژنامەگەریی کوردی هەڵبسەنگێنین، ئەرکی حکومەت و دەسەڵاتی
سیاسییە کێشە و کەموکوڕییەکانی بەردەم ئازادی کاری رۆژنامەگەری چارەسەر بکات، یاساکانی
کاری رۆژنامەگەری و مافی دەستخستنی زانیاری وەک خۆی جێبەجێ بکات و گۆڕانکاری لە
شێوازی مامەڵەکردنی هێزە ئەمنییەکان لەگەڵ رۆژنامەنووساندا بکات".
لەسەرمانە بە چاوی رێزەوە سەیری پیشە و ئەرکی رۆژنامەگەری بکەین
باسی لەوەشکرد:" لە بەرامبەریشدا کەناڵەکانی راگەیاندن و
رۆژنامەنووسانیش لەرێگەی پەرەپێدان بە توانا پیشەییەکانی خۆیان و پابەندبوونیان بە
بەها باڵاکانی رۆژنامەگەری، ئاستی متمانە بە کاری رۆژنامەگەری لەناو کۆمەڵگادا
بەرز بکەنەوە، لەسەرمانە بە چاوی رێزەوە سەیری پیشە و ئەرکی رۆژنامەگەری بکەین و
پارێزەری ئازادی کاری رۆژنامەگەری بین".