وەزیری کار و کاروباری کۆمەڵایەتیی عێراق رایگەیاند، یەک ملیۆن و 600 هەزار دەرچووی زانکۆ لە وەزارەتەکەیان ناویان تۆمارکردووە و بەدوای کاردا دەگەڕێن.

پێویستمان بە بەرنامە و پلانی درێژخایەن هەیە

ئەحمەد ئەسەدی، وەزیری کار و کاروباری کۆمەڵایەتیی عێراق لە راگەیەندراوێکدا ئاماژەی بەوەکرد، لەگەڵ زیادبوونی ژمارەی دانیشتووان ئەرکی ئەوان قورستر بووە و پێویستیان بە بەرنامە و پلانی درێژخایەن هەیە، هەروەها هاوئاهەنگی لەگەڵ کەرتی تایبەت بۆ دۆزینەوەی کار بۆ دەرچووانی زانکۆ لە سەرجەم سێکتەرە جیاوازەکان.

ئەوەشی خستەڕوو:" پێویستە بۆ ئەو ژمارە زۆرە لە دەرچووی زانکۆ کە بە دوای کاردا دەگەڕێن چارەسەر بدۆزینەوە و ئەمەش ئاڵنگارییە بۆ ئێمە ".

وەزیری کار و کاروباری کۆمەڵایەتیی عێراق وتیشی، لەم قۆناغەدا کۆمەڵێک بەرنامەی تایبەتیان هەیە بۆ ئەو دەرچووانە لەگەڵ پێدانی قەرز.