ئەندامێکی یەکگرتووی ئیسلامی کوردستان رایگەیاند، ناچنە هیچ گفتوگۆیەک بۆ دواخستنی هەڵبژاردن.
ئەمڕۆ سێشەممە، مستەفا عەبدوڵا، ئەندامی مەکتەبی سیاسی یەکگرتوی ئیسلامی کوردستان، بە بەشی کوردی دەنگی ئەمەریکای اگەیاند:" ئێمە لەگەڵ دواخستنی هەڵبژاردنی پەرلەمانی کوردستان نیین، دەمانەوێت هەڵبژاردن لە وادەیخۆیدا ئەنجامبدرێت و چیتر دامودەزگاکانی هەرێم لە بۆشایی یاساییدا نەبن. گفتووگۆش لەسەر دواخستنی هەڵبژاردن ئەنجام نادەین"'
چیتر هەرێم بەرگەی بۆشایی یاسایی و دەستوری ناگرێت
وتیشی:" هەڵبژاردنی پەرلەمان مەرسومی سەرۆکایەتی هەرێمی ناوێت، چونکە پێشتر مەرسومی دەرکردووە. کۆمیسیۆنی هەڵبژاردنی عێراق ڕێکارەکانی ئەنجامداوە و کاتێکی کەممان لەبەردەمدایە بۆ وادەی هەڵبژاردن، گەر یەکێتی و پارتی گفتوگۆ لەسەر دواخستنی هەڵبژاردن بکەن، خۆیان بەرپرسیارن و چیتر هەرێم بەرگەی بۆشایی یاسایی و دەستوری ناگرێت".
باسی لەوەش کرد:" گەر هەڵبژاردن ئەنجامنەدرێت، دەسەڵاتداران قەوارەی هەرێم دەخەنە بەردەم مەترسی و زیاتر لاوازی دەکەن بەرامبەر بەغدا، چونکە نەمانی پەرلەمان و حکومەتی هەرێم شەرعییەتی هەرێم لاواز دەکات، بۆیە یەکێتی و پارتی بەرپرسیار دەبن لە دواخستنی هەڵبژاردن".