مەکتەبی سیاسی یەکێتی ئەمڕۆ بەسەرپەرشتی هاوسەرۆکانی (بافڵ تاڵەبانی و لاهور شێخ جەنگی) کۆبووەوە، تیایدا بەرهەم ساڵح سەرۆککۆماری عێراق ئامادەی کۆبوونەوەکە بوو.

ئەمڕۆ سێشەممە چواری ئابی ٢٠٢٠ لە شاری سلێمانی مەکتەبی سیاسی یەکێتی بەسەرپەرشتی هاوسەرۆکانی یەکێتی بافڵ تاڵەبانی و لاھور شێخ جەنگی و ئەندامانی مەکتەبی سیاسی یەکێتیی، لەگەڵ بەرهەم ساڵح سەرۆککۆماری عێراق کۆبوونەوە، لەبارەی چەند پرسێکی گرنگ و جێی بایەخ، دوا گۆرانکاریی و پێشھاتە سیاسی و ئابووری و ئەمنییەکانی کوردستان و عێراق و ناوچەکە گفتوگۆکرا.

بە گوێرەی زانیارییەکان، لە بەشێکی کۆبوونەوەکەدا جەخت لە گرنگی چارەسەرکرنی سەرجەم کێشە و قەیرانەکان بە ھەمەھانگی لە نێوان گشت لایەنە سیاسییەکان لە پێناو تێپەڕاندنی دۆخەکە و کۆتایی ھێنان بە کێشە و قەیرانەکان، لە بەرژەوەندی پرۆسەی سیاسی کرایەوە.

لەبەشێکی دیکەی کۆبوونەوەکەدا، باس  لەپێویستی چارەسەرکرنی پرسی دابینکردنی بژێوی ژیانی ھاووڵاتیان و مووچەی مووچەخۆران، بەتایبەتی چارەسەرکردنی کێشە ھەڵپەسێردراوەکانی نێوان ھەردوو حکومەتی ھەرێمی کوردستان و حکومەتی فیدراڵی، کۆتایی ھێنان بەو پرسە.