قوباد تاڵەبانی، جێگری سەرۆکوەزیرانی هەرێم لەگەڵ جەیمس
جێفری نێردەی تایبەتی سەرۆکی ئەمریکا، هەماهەنگی نێوان هێزەکانی پێشمەرگە و هاوپەیمانان
و دانوستانەكانی هەولێر و بەغدادی تاووتوێكرد.
لەڕاگەیەندراوێكدا نوسینگەی جێگری سەرۆكوەزیرانی هەرێم رایگەیاندووە،
"لە تەوەری یەکەمی کۆبوونەوەکەدا کە ئەمڕۆ ٢٢ی ئەیلولی ٢٠٢٠ بەڕێوەچوو، قوباد
تاڵەبانی لەگەڵ نێردەی تایبەتی سەرۆکی ئەمریکا بۆ کاروباری سوریا و هاوپەیمانی نێودەوڵەتی
دژ بە داعش، تاووتوێی دۆخی سوریا و چۆنیەتی بەرەنگاربوونەوەی مەترسییەکانی رێكخراوی
داعشی لە هەردوو وڵاتی سوریا و عێراق كرد".
لە بەشێكی دیكەی راگەیەندراوەكەدا هاتووە، هەردوولا هاوڕابوون
لەسەر پێویستیی هەماهەنگی زیاتری نێوان هێزەکانی پێشمەرگە و سوپای عێراق و هێزەکانی
هاوپەیمانان، بۆ کۆتاییهێنان بە مەترسییەكانی تیرۆر و توندوتیژی.
هەروەها لە کۆبوونەوەکەدا باسی پڕۆژەیاسای بودجەی ٢٠٢٠ی
عێراق و رەوتی دانوستانەکانی هەولێر و بەغداد کراوە، كە ئامانج لێی چارەسەركردنی كێشە
هەڵپەسێردراوەكان و گەیشتنە بە رێككەوتنێكی گشتگیر و درێژخایەن، وەك لەڕاگەیەندراوەكەی
نوسینگەی جێگری سەرۆكوەزیرانی هەرێم هاتووە.