لیژنەکانی قائیمقامیەتی سلێمانی سەنتەری ڤانە
بیوتیان لە بازاڕی کاسۆمۆڵی شاری سلێمانی بەهۆی فرۆشتنی دەرمانی ریگەپێنەدراو بە
هاوڵاتییان داخست.
قائیمقامیەتی سلێمانی،ئەمڕۆ سێشەممە، ٩ی
شوبات، لە پێگەی تایبەتی خۆی لە فەیسبوک رایگەیاندووە:" سەنتەری ڤانە بیوتی لە
بازاڕی کاسۆمۆڵی شاری سلێمانی بەهۆی فرۆشتنی دەرمانی رێگەپێنەدراو و دروستکردنی
مەترسی بۆسەر تەندروستی هاوڵاتییان لەلایەن لیژنە هاوبەشەکانیانەوە داخراوە و
خاوەنەکەی رووبەڕووی رێکاری یاسایی دەکرێتەوە".
هەرلەوبارەیەوە، د. پەرست نەقشبەندی، نوێنەری
بەڕێوەبەرایەتی تەندروستی لە لیژنە هاوبەشەکانی قائیمقامیەتی سلێمانی
رایگەیاندووە:" فرۆشتنی هەریەکە لە دەرمانەکانی جوانکاری و بەهێزکردنی جەستە
و چەند دەرمانێکی دیکەش پێویستیان بە رێنمایی پزیشکی پسپۆڕ هەیە بۆ بەکارهێنانیان بە
پێچەوانەوە مەترسی بۆسەر تەندروستی بەکارهێنەرەکەی دروستدەکەن".