کەناڵی ئافەرین ئاماژەی بەوەکرد، بەهۆی گرفتی ماددیەوە ناچار بوون بەوەی سیناریۆی ماڵی سمۆرەخان بۆ ریکلامێکی بازرگانی بەکاربهێنن، بەڵام بەهۆی ناڕەزایەتییەکان ریکلامەکەیان راگرت.

کەناڵی "ئافەرین" لە روونکردنەوەیەکیدا باسی لەوەکردووە:" وەک رێزێک بۆ بینەرەکانمان و بە هەندوەرگرتنی سەرنج و گلەییەکانیان، بڕیارماندا ریکلامەکە لە کەناڵی ئافەرینەوە راگرین و پۆزش بۆ کۆمپانیاکە بهێنینەوە و تەواوی سوود و قازانجە مادییەکەیان بۆ بگێڕینەوە ".

ئەوەشی خستووەتەڕوو:" ئافەرین لەرابردوو و ئێستاشدا وەک خەمخۆرێک هەوڵیداوە زۆرترین سود بە منداڵان بگەیەنێت و هەموو ئەو کەلێنانە پڕکاتەوە کە لە کۆمەڵگەدا هەبووە و هەرگیز لەگەڵ ریکلامدا نییە و نەبووە، بەڵام کە دەستمان بۆ بردووە ناچاری بووە بۆ پڕکردنەوەی کەلێنی مادیی کەناڵەکە و بەردەوامی پڕۆژەی ئافەرین ".

روونیشیکردووەتەوە:" ئافەرین هیچ حزب و تاقم و کۆمپانیایەکی گەورەی لەپشت نییە تا هاوکاری بێت، هەموو سەرچاوەی داهاتەکەی ریکلام و هاوکاری خێرخوازانە ".

پەیامی ریکلامەکە هیچ شتێکی ناپەروەردەیی و نائەخڵاقی و خراپی تێدا نییە

لە روونکردنەوەدا ئەوەش هاتووە:" هەرچەندە پەیامی ریکلامەکە هیچ شتێکی ناپەروەردەیی و نا ئەخڵاقی و خراپی تێدا نییە، پێچەوانەی پەیامی گۆرانییەکەش نییە تا ئەوە شتێکی ناپەروەردەیی بێت، چونکە سمۆرەکان خۆیان دەرگا ناکەنەوە و داوا لە دایکیان دەکەن دەرگاکە بکاتەوە و دایکیان دەرگاکە دەکاتەوە و دایکیشیان سەرچاوەی ترسە بۆ رێویەکە لەگۆرانیەکەدا کە پێشتر منداڵەکان بۆیە دەرگایان نەدەکردەوە چونکە دایکیان لەماڵ نەبوو ".