خانمە پێشکەشکاری کەناڵی CNNی ئەمەریکی رایگەیاند، بەهۆی ئەوەی رەتیکردووەتەوە لە چاوپێکەوتنیدا لەگەڵ ئیبراهیم رەئیسی سەرپۆش بکات، سەرۆکی ئێران چاوپێکەوتنەکەی لەگەڵی هەڵوشاندووەتەووە.

كريستيان ئەمانپور، خانمە پێشکەشکاری کەناڵی CNNی ئەمەریکی ئاماژەی بەوەکردووە:" بۆ ماوەی چەندین هەفتە ئامادەکاریی بۆ چاوپێکەوتنێکی لەگەڵ ئیبراهیم رەئیسی سەرۆکی ئێران کردووە، کە لە ئێستادا بۆ بەشداریکردن لە کۆبوونەوەی لوتکەی نیویۆرک لەئەمەریکادایە ".

ئەوەشی خستووەتەڕوو:" لەکاتی ئامادەبوون لە شوێنی چاوپێکەوتنەکان و تەواوکردنی سەرجەم ئامادەکارییە هونەری و تەکنیکییەکان، راوێژکارێکی سەرۆکی ئێران پێیوتم کە ئەگەر سەرپۆش لەسەر نەکەم ئیبراهیم رەئیسی ئامادە نییە چاوپێکەوتنەکە ئەنجامبدات ".

ئەو پێشەشکارە ئەمەریکییە باسی لەوەشکردووە:" لە ئەمەریکادا هیچ یاسایەک نییە بۆ زۆرەملێکردنی خانمان بۆ ئەوەی سەرپۆش بکەن، بۆیە ئەو داوایەی سەرۆکی ئێرانم رەتکردەوە، ئەویش چاوپێکەوتنەکەی ئەنجامنەدا ".