شارەزایەکی کەشناسی ئاشکرایکرد،
لە چەند رۆژی داهاتوودا شەپۆلێکی بەهێزی باران بارین ناوچە جیاوازەکانی هەرێمی
کوردستان دەگرێتەوە.
ئاراس جەبار شارەزای
کەشناسی رایگەیاند:" لە رۆژی دووشەممەوە، هەرێمی کوردستان و ناوچەکە بە گشتی
دەکەونە ژێر کاریگەری بارستەیەک هەوای شی بەرز لە ئەنجامی چالاکبوونی نزمە
پاڵەپەستۆیەکی بەهێز لە باکووری ئەفەریقا و دەریای سووری عەرەبییەوە، سەرەتای
کاریگەرییەکانیشی بە تاوە باران و هەورە بروسکەی مامناوەند دەستپێدەکات".
ئاماژەی بەوەشکرد:"
پاشان لە رۆژی سێشەممە، کاریگەری ئەو نزمە پاڵەپەستۆیە قوڵدەبێتەوە و دەبێتە هۆی
چالاکبوونی هەورە بروسکەی توند و لێزمە باران لە سەرجەم ناوچەکانی هەرێمی کوردستان،
هەروەها لە هەندێک ناوچەش هەوری سوپەرسێڵ دروستدەبێت و تەرزەی گەورە دەبارێت و لافاویش
لە شوێنی جیا جیا دروست دەبێت".
باسی لەوەشکرد:" بە
گشتی ئەمە دووەم شەپۆلی بەهێزی وەرزی باران بارینی ئەمساڵە کە ناوچەکانمان
دەگرێتەوە و تیایدا پێشبینی بارانێکی زۆر دەکرێت کە بە جیاوازی ناوچەکان لە 50
ملیم تا 150 ملیم زیاتر چاوەڕوان دەکرێت".
ئاراس جەبار
روونیشیکردەوە:" کاریگەری نزمە پاڵەپەستۆکە لە رۆژی چوارشەممەوە بەرەو لاوازبوون
دەچێت، بەڵام تاوە بارانی بەهارە و هەورە بروسکە بەهۆی ئەو شێ زۆرەی دێتە
ناوچەکەوە م ناوبەناو تاوەکو 25ی مانگ بەردەوام دەبێت".