دەربارەی كشانەوەی هێزەكانی هاوپەیمانان لە عێراق بەهۆی ئەو سەقامگیرییەی ئێستا عێراقی تێدایە سەرۆكی ئەنجومەنی وەزیرانی عێراق روونكردنەوە دەدات.
نوسینگەی راگەیاندنی محەمەد شیاع سودانی، سەرۆك وەزیرانی عێراق لە راگەیەندراوێكدا بڵاویكردەوە:" سەرۆك وەزیرانی عیراق لەگەڵ تۆبیاس لیندنەر، وەزیری دەوڵەتی ئەڵمانیا بۆ كاروباری دەرەوەی ئەڵمانیا و شاندی یاوەری كۆبووەتەوە و چەند پرسێك تاوتوێكراوە".
سەرۆك وەزیرانی عێراق لە كۆبوونەوەكەدا ئاماژەی بەوەكردووە:" وڵاتەكەمان پێشوازی لە كۆمپانیا ئەڵمانییەكان و هاوبەشەكانی دیكە دەكات لە پڕۆژەكانی گەشەسەندن و باشتركردنی ژێرخانی ئابوری وڵات، حكومەت بەردەوامە لە فراوانكردنی ژینگەی وەبەرهێنان و راكێشانی شارەزایی جیهانی".
باسی لەوەشكردووە:" ئەو دۆخە سەقامگیری و ئاسایشەی ئەمڕۆ لە عێراق بەدەست هاتووە و پەرەسەندنی تواناكانی هێزە ئەمنییەكانمان پێشكەوتنەكان لە كۆتاییهێنان بە بوونی هاوپەیمانی نێودەوڵەتی و گۆڕان بۆ پەیوەندییە دووقۆڵییەكان لەگەڵ وڵاتانی ئەندامدا پشتڕاست دەكەنەوە".
ئەوەشیخستووەتەڕوو:" ئەم سەقامگیرییەی ئێستا كە باڵا بەسەر تەواوی عێراقدا كێشاوە هەنگاوێك لەو راستییە نزیكترمان دەكاتەوە كە ئەركی هاوپەیمانان دەبێت بەرەو كۆتایی بچێت".