لە رێگای تیمێكی تایبەتیانەوە ڤیم فاوندەیشن ماوەی سێ رۆژە بەردەوامە لە پاككردنەوەی بەنداوی دەربەندیخان كە بەهۆی پاشماوەی نەخۆشخانە و سەیرانكارانەوە بەتەواوەتی پیس بوو.

 لەبارەی هەڵمەتی پاككردنەوەی بەنداوی دەربەندیخان لە پاشماوەكان، بەرپرسی پڕۆژەكەی ڤیم فاودەیشن بە پەیامێری BMC راگەیاند:" بەهۆی نەبوونی فلتەر لەسەر ئاوی تانجەرۆ پاشماوەی سەیرانكاران و نەخۆشخانە و پاشماوە ماوەبەسەرچووەكان لەنێو بەنداوی دەربەندیخان كۆبووەتەوە و سەرەنجامیش بڕیارماندا ئەم هەڵمەتە بە خێرایی جێبەجێبكەین".

لە ماوەی سێ رۆژدا زیاتر لە 100 تۆن پاشماوە لە بەنداوەكە هێندراوەتە دەرەوە

وتیشی:" لە ماوەی سێ رۆژی كاركردنی تیمەكەماندا زیاتر لە 100 تۆن پاشماوەمان لە بەنداوی دەربەندیخاندا هێناوەتە دەرەوە و هەڵمەتەكەشمان تا ئێستا بەردەوامی هەیە".

لە ئێستادا لەبەشی خوارەوەی بەنداوەكەدا كاردەكەین

ئاماژەی بەوەشكردووە:" پێشتر لەسەر ئەم پڕۆژە هاوشێوانە كارمانكردووە، لە ئێستادا لەبەشی خوارەوەی بەنداوەكەدا كاردەكەین، چونكە نەماندەزانی بەم رێژەیەی ئێستا پاشماوەی خۆڵ و خاشاك لەنێو بەنداوەكەدایە".

بەنداوەكە 300 تۆن خۆڵ و خاشاك و پاشماوەی لەخۆ گرتووە

روونیشیكردەوە:" هەوڵەكانمان بۆ بەردەوامبوون لە سەر پێشكەشكردنی پڕۆژەی هاوشێوە بەردەوامی دەبێت و تا ئێستاش بەپێی بەدواداچوونەكانمان بەنداوەكە 300 تۆن خۆڵ و خاشاك و پاشماوەی لەخۆ گرتووە".