بافڵ جەلال تاڵەبانی لە میانەی کۆبوونەوەیەکی لەگەڵ ئەندامی لیژنەی کاروباری دەرەوەی ئەنجومەنی نوێنەرانی ئەمەریکا رایگەیاند، جەخت لە بەڕێوەچوونی دەکەنەوە لە وادەی خۆیدا.

نوسینگەی راگەیاندنی سەرۆکی یەکێتی نیشتمانی کوردستان رایگەیاند:" بافڵ جەلال تاڵەبانی، سەرۆکی یەکێتیی نیشتمانیی کوردستان لە واشنتن لەگەڵ کۆنگرێسمان براد شنایدەر، ئەندامی لیژنەی کاروباری دەرەوەی ئەنجوومەنی نوێنەرانی (دیموکراتەکان) کۆبووەوە".

ئاماژەی بەوەشکرد:" لە کۆبوونەوەکەدا کە دەرباز کۆسرەت رەسوڵ، لێپرسراوی مەکتەبی پەیوەندییەکان ئامادەبوو، دوایین گۆڕانکارییەکانی ناوچەکە گفتوگۆیان لەبارەوەکرا و جەخت لە بەردەوامیی هەوڵە نێودەوڵەتییەکان کرایەوە بۆ پاراستنی ئارامی و ئاسایش لە ناوچەکە".

فاکتەری سەرەکیی بەدیهێنانی سەقامگیری و ئاڕاستەکردنی وڵاتە بەرەو خۆشگوزەرانی

باسی لەوەشکرد:" بافڵ جەلال تاڵەبانی هەڵوێستی یەکێتی لەبارەی دۆخی هەرێمی کوردستان و عیراق روونکردەوە و ئاماژەی بەوەکرد، بەردەوامیی گفتوگۆی بەرپرسیارانەی نێوان هێزە سیاسییەکانی هەرێمی کوردستان و عیراق، فاکتەری سەرەکیی بەدیهێنانی سەقامگیری و ئاڕاستەکردنی وڵاتە بەرەو خۆشگوزەرانی، بۆ ئەمەش دەبێت هەموولایەک بەرژەوەندییە نیشتمانییەکان پێشبخەن و هەوڵەکان لەخزمەت خەڵکدا بێت".

بەردەوامیی هاوکارییەکان بۆ هێزی پێشمەرگە تەوەرێکی دیکەی دیدارەکەبوو

نوسینگەی راگەیاندنی سەرۆکی یەکێتی روونیشیکردەوە:" پرسی تیرۆر و بەردەوامیی هاوکارییەکان بۆ هێزی پێشمەرگە تەوەرێکی دیکەی دیدارەکەبوو و لەوبارەیەوە بافڵ جەلال تاڵەبانی وتی، جەخت لە چاکسازی و یەکخستنی هێزی پێشمەرگە دەکەنەوە لەچوارچێوەی هێزێکی نیشتمانی و نەتەوەییدا، فراوانکردنی هەماهەنگییە سەربازییەکانیش لەنێوان هەرێمی کوردستان، عیراق و هاوپەیمانیی نێودەوڵەتیدا دەبێتە مایەی سەقامگیریی زیاتری ناوچەکە و دوورخستنەوەی مەترسییەکانی تیرۆر لەسەر ژیانی خەڵک".

جەخت لە بەڕێوەچوونی دەکەنەوە لە وادەی دیاریکراوی خۆیدا

ئاشکراشیکرد:" لەکۆتایی کۆبوونەوەکەدا سەرۆکی یەکێتی جگەلەوەی جەختی لە پاراستنی مافە دەستوورییەکانی گەلی کورد لە عیراق کردەوە، راشیگەیاند، باشترین بژاردە بۆ گۆڕانکاری لە پرۆسەی حوکمڕانی و هەنگاونان بەرەو هەرێمێکی دیموکراسی و خۆشگوزەرانتر هەڵبژاردنە، هەروەها جەخت لە بەڕێوەچوونی دەکەنەوە لە وادەی دیاریکراوی خۆیدا".