وەزیری دەرەوەی ئەمریکا بەڵێنیدا لەمڕۆوە واشنتۆن
هێز بۆ رووخاندنی وڵاتانی دیکە بەکارنەهێنێت و دەڵێت "دەستێوەردانەکانی
پێشووی ئەمریکا ناوبانگی دیموکراسییەتی وڵاتەکەی شێواندووە".
ئەمڕۆ چوارشەممە، ٣ی ئاداری ٢٠٢١، ئەنتۆنی بلێنکن،
وەزیری دەرەوەی ئەمریکا رایگەیاند:" ئیدارەی بایدن دەیەوێت ئەو رێڕەوانە
بگۆڕێت کە لەلایەن ئیدارەکانی پێشوودا بۆ گۆڕینی دەسەڵات لە وڵاتانی دیکە پەیڕەو دەکرا و لەمڕۆوە لە بری دەستێوەردانی سەربازی، گفتوگۆی دبلۆماسی پەیڕەو دەکەن".
ناوبراو راشیگەیاند:" دەستێوەردانەکانی پێشووی
ئەمریکا ناوبانگی دیموکراسی وڵاتەکەی شێواندووە و بووەتە هۆی لەدەستدانی متمانەی
گەلی ئەمریکا".
ئاماژەی بەوەشکرد:" ئێمە بە جۆرێکی جیاواز کار
دەکەین و لە رێگەی دەستێوەردانی سەربازی و هەوڵی لەناوبردنی دەسەڵاتە ستەمکارەکان
بە زەبری هێز هانی دیموکراسی نادەین، پێشتر ئەو ئەزموونەمان تاقیکردەوە و سەرباری
نیازپاکیمان، بەڵام سەرکەوتوو نەبووین".