پۆلیسی هەولێر ئاشکرایکرد، ئەو کەسە دەستگیرکرا کە ناوی ئاسایشەوە رێگری لە هاوڵاتییەک کردبوو و پارە و مۆبایلی لێی سەندبوو.
ئەمڕۆ چوارشەممە، ٧ی نیسانی ٢٠٢١، بەڕێوەبەرایەتی پۆلیسی هەولێر بڵاویکردەوە:" تۆمەتبارێک بە ناوی (ا. ص. م) لەلایەن بەشی پۆلیسی فریاکەوتنی هەولێرەوە دەستگیرکرا، کە لەسەر شەقامی ١٠٠ مەتری و لە نزیکی گەڕەکی هەولێری نوێ بە ناوی ئاسایشەوە رێگری لە هاوڵاتییەک کردبوو و پارە و مۆبایلی لێ سەندبوو ".
ئاماژە بەوەشکراوە:" تۆمەتبارەکە هاوڵاتییەکی مەدەنییە و هیچ پەیوەندییەکی بەهێزەکانی ئاسایشەوە نییە، دوای دەستگیرکردنیشی رادەستی پۆلیسی نەهێشتنی تاوان کرا ".