بەشی راگەیاندن و پەیوەندییەکانی ئیدارەی گەرمیان ئاشکرایکرد، لە هێرشە مووشەکییەکەی قەزای کفری جگە لەوەی کەسێک بە سوکی بریندار بوو، هیچ زیانێکی دیکەی گیانی نەبوو.

بەشی راگەیاندن و پەیوەندییەکانی ئیدارەی گەرمیان لە راگەیاندراوێکدا زانیاری لەبارەی هێرشە مووشەکییەکەی شەوی رابردووی قەزای کفری بڵاوکردەوە و تێیدا هاتووە:" کاتژمێر ٧:٢١  خولەکی ئێواره‌ی رۆژی یه‌كشه‌ممه، لە ناوچەی قوریچای نزیک کفریەوە دوو کاتیۆشا ئاڕاستەی ناو قەزای کفری کران و بەر دوو گەڕەکی شارەکە کەوتن، لەئەنجامی ئەو هێرشەدا جگە لەوەی ھاوڵاتیەک بە سوکی برینداربوو، ھیچ زیانێکی دیکەی نەبوو ".

ئاماژە بەوەشکراوە:" باری ئەمنی کفری ئاساییە و ھێزەکانی پێشمەرگە لە شوێنێ خۆیان لەدەوروبەری کفری جێگیرکراون، ھێزەکانی ئاسایشی گەرمیانیش بۆ پشتیوانی ھێزی پێشمەرگە لە کفری لەئامادەباشیدان و دەزگا ئەمنیەکانیش لێکۆڵینەوەیان لەبارەی چۆنیەتی کردەوە تیرۆریستییەکە دەستپێکردووە ".