نزیکەی دوو مانگ
بۆ وادەی بەڕێوەچوونی هەڵبژاردنە چاوەڕوانکراوەکەی عێراق ماوە و یەکێتی و گۆڕان لە
رێگەی هاوپەیمانێتییەکەیانەوە هەوڵی بەدەستهێنانی زۆرترین دەنگ دەدەن.
پاش دیاریکردنی
قوباد تاڵەبانی وەک سەرۆکی لیستی هاوپەیمانی کوردستان سەردان و کۆبوونەوەکانی
هاوپەیمانێتییەکە دەستیپێکرد و ئەمڕۆش سەردانی مەکۆی گۆڕانی کرد.
" قوباد
تاڵەبانی ئەزموونێکی سەرکەوتووی لە سەرۆک لیستیی هەیە و شارەزای بارودۆخی سیاسی
عێراقیشە "
سەلما فاتیح،
ئەندامی فراکسیۆنی یەکێتی لە پەرلەمانی کوردستان بە BMC راگەیاند:" بەدڵنییایەوە بە هەوڵی قوباد تاڵەبانی هاوپەیمانی کوردستان
ئەنجامێکی زۆر باش بەدەست دەهێنێت، لەبەر ئەوەی پێشتر ئەزموونی سەرۆکی لیستی هەبووە
و بە پێی ئەوەی ئەم هەڵبژاردنەش لەسەر ئاستی عێراقە و قوباد تاڵەبانیش
شارەزاییەوکی باشی لە بارودۆخی سیاسی عێراق هەیە و پێشتر سەرۆکایەتی شاندی
دانوستانکاری حکومەتی هەرێم لەگەڵ حکومەتی فیدراڵ کردووە ".
هاوپەیمانی
کوردستان کە تاکە هاوپەیمانی کوردستانییە لە عێراقدا، بە ٤٧ کاندیدی یەکێتی و
گۆڕان و لە ٢٧ بازنەدا بۆ بەشداریکردن لە هەڵبژاردنی پێشوەختەی عێراق رکابەرایەتی
لایەنەکانی دیکە دەکات.
"ئامانجمان رێکخستنەوەی نێو ماڵی کوردە"
یاسین حەمەعەلی، بەرپرسی
ژووری هەڵبژاردنی بزووتنەوەی گۆڕان بە BMC وت:" ئامانجمان ئەوەبوو
هاوپەیمانێتییەکی فراوان بۆ رێکخستنەوەی نێو ماڵی کورد پێکبهێنین و داواجار
گەیشتین بە رێککەوتن لەسەر پێکهێنانی هاوپەیمانی کوردستان لەگەڵ یەکێتی و بە
یەکگرتوویمان دەتوانین بەرگری لە مافە رەواکانی کورد لە بەغدا بکەین و ئەو کێشە
کەڵەکەبووانەی چەندین ساڵە لە نێوان هەردوو حکومەتی هەرێم و ناوەند بە هەڵپەسێدراوی
ماونەتەوە چارەسەر بکرێن ".
" هاوپەیمانی
کوردستان بە ٤٧ کاندیدی لەسەر ئاستی هەرێمی کوردستان و ناوچە دابڕێنراوەکان و لە ٢٧
بازنەدا بەشداری لە هەلبژاردنی پێشوەختەی عێراق دەکات" یاسین حەمەعەلی وای
وت.
شوناس شێرکۆ،
ئەندامی ژووری پەیوەندییە دبلۆماسییەکانی گۆڕان تایبەت بە BMC راگەیاند:" هاوپەیمانی کوردستان لەکاتێکدا دروستبوو کە پشتگیریکردن و
داواکردنی یەکڕیزی لەنێو ماڵی کورد لە هەموو کاتێک زیاتر بوو، ئەوەش وایکرد بیر لە
پێکهێنانی هاوپەیمانێتییەک بکرێتەوە و لایەنە سیاسییەکان بە یەکگرتووی بتوانن لە
قۆناغی داهاتوودا لە بەغدا بەرگری لە ماف و شایستەکانی هەرێمی کوردستان بکەن
".
بڕیارە هەڵبژاردنی پێشوەختەی عێراق لە رۆژی ١٠ تشرینی یەکەمی ئەمساڵ
بەڕێوەبچێت و هاوپەیمانی کوردستانیش بە سەرۆکایەتی قوباد تاڵەبانی وەک یەکەم
هاوپەیمانی کوردستانی بەشداری لە پرۆسەیە دەکات.