کەمێک پێش ئێستا هێزەکانی سووریای دیموکرات و ئاسایشی ناوخۆی عێراق کۆنترۆڵکردنی دەوروبەری زیندانی غوێران و گەمارۆدانی ژمارەیەکی زۆری چەکدارانی داعشیان لە ناو زیندانەکەدا راگەیاند.
ئەمڕۆ دووشەممە ٢٤ی کانوونی دووەم، ئاژانسی هاوار لە راگەیەندراوێکدا ئاماژەی بەوەکرد:" هێزەکانی ئاسایشی ناوخۆی عێراق بە پشتیووانی هێزەکانی سووریای دیموکرات، توانیان دەوروبەری زیندانی غوێران لە حەسەکە بەتەواوی کۆنترۆڵ بکەن و ژمارەیەکی زۆری چەکدارانی داعشیش لەناو زیندانەکەدا گەمارۆبدەن".

بەشێکی زۆری چەکدارەکان خۆیان رادەستی شەڕڤانان کردووە

ئەوەشیخستەڕوو:" بەهۆی گەمارۆی سەر زیندانەکەوە، بەشێکی زۆری چەکدارانی رێکخراوە تیرۆریستییەکە خۆیان رادەستی هێزەکانی سووریای دیموکرات کردووە و لە ئێستاشدا ‌شەڕڤانەکان لەسەر بڵند گۆیەکەی نزیک زیندانەکەوە داوا لە چەکدارەکانی دیکە دەکەن، ئەوانیش خۆیان رادەست بکەن و زیندانەکە چۆڵ بکەن".

هێزەکانی هاوپەیمانانیش بەشدارن لە کۆنترۆڵکردنەوەی زیندانی غوێران

راشیگەیاند:" لە ئێستادا هێزەکانی هاوپەیمانان بە سەرۆکایەتی ئەمەریکا هاوشانی هێزەکانی ئاسایشی ناوخۆ و شەڕڤانانی هەسەدە بەشدارن لە کۆنترۆڵکردنەوەی زیندانی غوێران و دەستبەسەرکردنی چەکدارانی رێکخراوە تیرۆریستییەکە".
ئەمەش دوای ئەوەدێت، لەماوەی چەند رۆژی رابردوودا چەکدارانی داعش هێرشیانکردە سەر زیندانی غوێران لە ناوچەی حەسەکە و توانیان زیندانەکە داگیربکەن،کە بەهۆیەشەوە بەشێکی زۆری ئەو زیندانییانەی لەو زیندانەدا سزا درابوون توانیان هەڵبێن و لە ناوچەکەدا بڵاوببنەوە.