بەڕێوەبەرایەتی گشتی کەشناسی و بومەلەرزەزانی
ئاماژەی بەوەکرد، نزمە پاڵەپەستۆی دەریای سپی ناوەڕاست روو لە ناوچەکە دەکات.
ئەمڕۆ سیشەممە ٢٥ی کانوونی دووەم،
بەڕێوەبەرایەتی گشتی کەشناسی و بومەلەرزەزانی هەرێم رایگەیاند:" سبەی
چوارشەممە لەکاتی شەودا نزمە پاڵەپەستۆی دەریای سپیی ناوەڕاست روو لە ناوچەکەمان
دەکات و رۆژی پێنجشەممەش کاریگەری شەپۆلەکە لەسەر ناوچەکە چالاکتر دەبێت".
بارستە هەوایەکی ساردیش لەگەڵ نزمە پاڵەپەستۆکەدا دەبێت
ئاماژەی بەوەشکرد:" تەواوی ناوچەکەمان
دەکەوێتە ژێر ئەو شەپۆلی ناوبراوەوە و باران بارین و بارستە هەوایەکی ساردیش لەگەڵ
نزمە پاڵەپەستۆکەدا دەبێت، هەروەها بەفر لە ناوچە شاخاوییەکانیش دەبارێت".
لەسەر ناوچە شاخاوییەکان بەفر بارین دەبێت
ئەوەشیخستەڕوو:" لە سەنتەری پارێزگای
هەولێر نمە باران و لە ناوچەکانی دیکە بارانی مامناوەند دەبێت، لەسەر ناوچە
شاخاوییەکان بەفر بارین دەبێت، بەتایبەت ئەو ناوچە شاخاویانەی هەزار و ٧٠٠ مەتر
لەسەر ئاستی رووی دەریاوە بەرزن".
دواتریش بەفر بارین دەستپێدەکات
بەڕێوەبەرایەتییەکە باسیلەوەشکرد:" لە
سەنتەری شارەکانی سلێمانی و هەڵەبجە سەرەتا نمە باران دەبێت و پاشان بۆ بارانی
مامناوەند دەگۆڕێت، دواتریش بەفر بارین دەستپێدەکات و تەواوی ناوچە بەرزەکانی ئەو
سنوورانە دەگرێتەوە".
ئاستی بارانی پێشبینیکراو لە سلێمانی لەسەروی ١٠ ملم دەبێت
روونیشیکردەوە:" ئاستی بارانی
پێشبینیکراو لە سلێمانی لەسەروی ١٠ ملم دەبێت، لە سەنتەری دهۆک لەگەڵ بارینی باران هەندێکجار
ئەگەری بارینی بەفرێکی کەم هەیە".
تا کاتەکانی بەرەبەیانی رۆژی هەینی لەسەر ناوچەکەمان دەمێنێتەوە
جەختیلەوەشکرد:" کاریگەری ئەم شەپۆلە تا
کاتەکانی بەرەبەیانی رۆژی هەینی لەسەر ناوچەکەمان دەمێنێتەوە، لەماوەی
کاریگەرییەکانی شەپۆلەکەش بەرزترین پلەکانی گەرما دەبێت بە دوو تا سێ پلە".