مەسعود بارزانی رایگەیاند، پارتی بایكۆتی هەڵبژاردنی نەكردووە، بەڵكو
لەگەڵ هەڵبژاردنێكی پاك و بێگەردە، کە دووربێت لە دەستوەردانی دەرەكی و بەرنامەی
پێشوەختەیە.
بارەگای بارزانی بڵاویکردەوە:" ئەمڕۆ چوارشەممە 20ی ئاداری 2024
لە سەلاحەددین مەسعود بارزانی، پێشوازیکرد لە ئەلینا ڕومەنسکی باڵیۆزی ئەمەریكا لە
عێراق كرد و تێیدا بالێۆزی ئەمەریکا نیگەرانیی خۆی و وڵاتەكەی لە دوا پێشهاتە
سیاسیەكان دەربڕی ".
ئەوەش خراوەتەڕوو:" باڵیۆزی ئەمەریکا داوایكرد كە پارتی
دیموكراتی كوردستان ڕۆڵی خۆی ببینێت و لەگەڵ لایەنەكانی تر پێكەوە كێشە و نیگەرانی
و تێبینیەكانی پەیوەست بە هەڵبژاردنەكانی هەرێم چارەسەر بكەن ".
بە پێی راگەیەندراوەکە، مەسعود بارزانی سەرۆکی پارتی دووپاتیكردەوە كە
پارتی بایكۆتی هەڵبژاردنی نەكردووە، بەڵكو لەگەڵ هەڵبژاردنێكی پاك و بێگەرد و
شەفاف و جێگەی دڵنیایی و دوور لە دەستوەردانی دەرەكی و بەرنامەی پێشوەختەیە كە
تێیدا دەنگدەران لە مافی دەنگدان بێبەش نەكرێن و پڕۆسەی دیموكراسی بێ بەها نەكرێت
و یاساکانی هەرێم پێشێل نەکرێن كە تێیدا دەنگدەران لە مافی دەنگدان بێبەش نەكرێن و پڕۆسەی دیموكراسی بێ بەها نەكرێت و یاساکانی هەرێم پێشێل نەکرێن.
هەر بە پێی ئەو راگەیەندراوە،
مەسعود بارزانی وتوویەتی:" هەر لە سەرەتای نەوەدەكانی سەددەی ڕابردوو پارتی
دەستپێشخەری بەڕێوەچوونی هەڵبژاردن بووە و خۆی لە ساڵی 1991 داوای كردووە كە
پێویستە شەرعیەتی شۆڕشگێڕی جێگەی خۆی بداتە شەرعیەتی دەستووری و هەڵبژاردن بكرێ
".
راشیگەیاندووە:" پارتی هەمیشە لەگەڵ ئەنجامدانی هەڵبژاردن بووە
ترسی لە هەڵبژاردن نیە بەڵكو تێبینی لەسەر شێوازی هەڵبژاردن و مەترسیی تێكدانی
بنەماكانی پێكەوەژیان و نەهێشتنی بەشداریی پێكهاتەكان لە ژیانی سیاسیدا هەیە ".
لە درێژەی قسەکانیدا مەسعود بارزانی باسی لەوەکرد:" بە بیانووی
جۆراوجۆر دووساڵ هەڵبژاردنیان دواخست، دەستی نامۆ و دەرەكی خرانە ناو ئەو بابەتە و
لە بەها و پێگەی هەرێمیان كەمكردەوە، هەروەها بە شێوەیەکی نا دەستوری و نا یاسایی
بڕیار و یاساکانی هەرێمی کوردستانیان گوڕی و ستەمێکی گەورەیان لە پێكهاتەكان و
تێكڕای خەڵكی كوردستان كرد ".