ئەندامێکی لیژنەی نەوت و گاز رایگەیاند، بەربەستە سیاسیەکانی پێش هەناردەکردنی نەوتی هەرێمی کوردستان نەماون و بە ئەگەرێکی زۆرەوە دوای جەژنی قوربان پڕۆسەکە دەستپێدەکاتەوە.

سەباح سوبحی، ئەندامی لیژنەی نەوت و گاز لە پەرلەمانی عێراق بە "دەنگی ئەمەریکا"ی راگەیاند:" بڕی دوو تریلیۆن و 700 ملیار دینار تەرناخکراوە بۆ کەرتی نەوت لە هەرێمی کوردستان و دەبێت رۆژانە 400 هەزار بەرمیل نەوت بەرهەم بهێنرێت ".

وتیشی:" گرفتە سیاسیەکان لەبەردەم هەناردەی نەوتی هەرێم نەماون و تەنها گرفتی تەکنیکی ماوە، پێدەچێت لەم ڕۆژانەدا کۆبوونەوەیەکی یەکلاکەرەوە بکرێت و دوای رۆژانی جەژنی قوربان بە ئومێدی ئەوەین هەناردەی نەوتی کوردستان دەستپێبکاتەوە ".

ئەو پەرلەمانتارە باسی لەوەشکرد:" یەکێک لە کیشەکان قەرزە کەڵەکەبووەکانی کۆمپانیا نەوتییەکانە، کە چۆن بتوانرێت ئەو کۆمپانیایانە رازی بکرێن هەناردەکردنی نەوت دەستپێبکەنەوە، دەبێت حکومەتی عێراق ئەو پرسە یەکلابکاتەوە."