دوو پێشبینی سەرسوڕهێنەر لە رۆژنامەی (الاهرام)ەوە

*55 ساڵ لەمەوبەر نووسەرێكی عەرەب پێشبینی هاندی مۆبایل-ی كردووە كە لە ساڵی 2000 دروستدەكرێت"
یەكێك لە دێرینترین و ناودارترین رۆژنامە عەرەبییەكان (الاهرام)ی میسریە، ئەم رۆژنامەیە زیاتر 145 ساڵ تەمەنیەتی و بەردەوامە لە دەرچوون، كاتی خۆی هەر نووسەر و رۆژنامەنووسێكی عەرەب، نووسینی لەم رۆژنامەیە بڵاوبكرایەتەوە، دەبوو بە (ئەستێرە) و پێش سەندیكای رۆژنامەنووسان نازناوی رۆژنامەنووس یان نووسەری پێدەدرا.
55 ساڵ بەر لە ئەمڕۆ  ساڵی 1966 لە یەكێك لە ژمارەكانی ئەو رۆژنامەیە، نووسەرو پزیشكی میسری (د. مستەفا مەحمود)، لە بەشێكی وتارێكی درێژیدا، باس لە ئامێری تەلەفۆن دەكات، كە وەكو شتێكی سەرسوڕهێنەر باسی هاندی مۆبایل دەكات كە لە ساڵی 2000ەوە دێتە ئاراوە، ئەمەش دەقی نووسینەكەیە:
" لە ساڵی 2000 تەلەفۆن دەبێتە ئاسانترین هۆكاری پەیوەندی كردن، چونكە قەبارەكەی بەقەد پاكەتێكی جگەرەی لێدێت و لەخاوەنەكەی جیانابێتەوە جا پیاو بێت یان ژن یاخود منداڵ.
هەموو ئەندامێكی خێزان تەلەفۆنێك و رەقەمێكی  تایبەت بە خۆی دەبێت، بەشێوەیەك كە كەس چاوەڕوانی ئەوەی تر ناكات تا تەلەفۆنەكەی تەواو دەبێت، هەروەك زیاتر لە كەسێك لە یەك ژوور دادەنیشن و هەر یەكەو بە تەلەفۆنی خۆی قسە دەكات، ئەمەش دەبێتە دیمەنێكی باو. ئەم تەلەفۆنە گواستراوە دەبێت بە شێوەیەك دەتوانرێت بگوازرێتەوە بۆ ناو ئۆتۆمبێل و  شەقام و هەر شوێنێك كە بۆی دەچیت".
 ئەم نووسین و پێشبینیەی نووسەرو پزیشكێكی دیار، لە كۆتاییەكانی ساڵی رابردوو 2020 هاتەوە نێو كایەی سۆسیال میدیاو قسەی زۆر لەبارەوە كرا، چونكە زۆرمان بیستووە لەسەر پێشبینیە بەدی هاتووەكان، بەڵام ئەو وتارەی (الاهرام) زۆر دەقیق باس لەو دیاردەیە دەكات كە ئەمڕۆ ناوی (مۆبایلە) تەنانەت مەسەلەی ئینتەرنێتیش هەر لە دوای 2000ەوە بەشێوەیەكی بەرچاو لە دونیا بڵاوبۆوە.
جگە لەم وتارە، لەساڵی 2004یش وتارێكی نووسەری گەورە ئەنیس مەنسور لە رۆژنامەی (الاهرام)، لەم ماوەیە هەرای نایەوە، كە لە گۆشە بەناوبانگەكەی (مواقف) نووسیبووی، كە لە شێوەی دیالۆگێك بوو، لەگەڵ هاوڕێ‌ ئیسرائیلییەكانی و لێیان دەپرسێت" ئێوە ئێستا مناڵەكانتان فێری چ زمانێك دەكەن؟، وەڵامەكەیان بەمشێوەیە بوو: زمانی عەرەبی، زمانی دووەم یان سێیەمە لە لامان، بۆیە دەبێت لە 10 ساڵی داهاتوو یان لەم سەدەیە، ئاشتی لەگەڵ عەرەب بەدی بێنین". ئەم وتارەش ئەو كاتە هاتەوە بەر دیدو فیكری خوێنەران، كاتێك لە دوو ساڵی رابردوو، (ئاشتی) هەقیقی لە نێوان ئیسرائیل و هەردوو وڵاتی عەرەبی (ئیمارات و بەحرێن) هاتە دی. 
لەوانەیە پێشبینی لە لایەن كەسانی گەردوونناس و جادوگەر هەبووبێت، بەڵام كاتێك نووسەرێكی ئاسایی وەكو د. مستەفا مەحمود پێشبینییەكی وا سەیر دەكات، كە بەم وردەكارییەوە باسی پێشكەوتنی تەكنەلۆژیاو پەیوەندی دەكات بەڕاستی جێگای هەڵوەستە لەسەركردنەو هەقی خۆمانە كە بەردەوام زەمەن بگەڕێنینەوە دواوەو بزانین چ گوزەراوە لەو سەردەمانە، بێگومان وتارەكەی ئەنیس مەنسوریش گرنگە چونكە لە 2004 بە تایبەت كە سەردەمەكەی دوای رووخانی رژێمی سەدام حوسێن و كۆمەڵێك گۆڕانكاری هەبوو لە ناوچەكە، هەرگیز كەس بە بیری نەدەهات كە دوو جەمسەری گرنگی عەرەبیی (ئیمارات و بەحرێن) لەگەڵ ئیسرائیل رێكبكەون و هاووڵاتیانیان لەگەڵ ئیسرائیل هامشۆی ئاسایی بكەن.
ئەم دوو نووسینەی لە رۆژنامەی (الاهرام) بڵاوبۆتەوە، بایەخی رۆژنامەكەی لای منی خوێنەر زیاتر كردووە، بە پێچەوانەی ئەوانەی دەڵێن رۆژنامەی كاغەزیی باوی نەماوە، ئێستاش رۆژنامەی سەنگین و وردو پڕۆفیشناڵی وەكو الاهرام و سەدانی تر هەر ماون و كاریگەری خۆشیان هەیە، جا نازانم داهاتوو چییان بەسەردێت.