مەحما خه‌لیل قایمقامی شه‌نگال ڕایگه‌یاند، گۆڕانكاری له ‌ڕێككه‌وتنی نێوان په‌كه‌كه‌ و هێزه‌ عێراقیه‌كان ڕوویداوه‌ و جموجۆڵی نامۆیان له‌ په‌كه‌كه‌ بینیوه‌.

قایمقامی شه‌نگال له‌میانه‌ی لێدوانێكیدا بۆمیدیایه‌كی عێراقی، ئاماژه‌ی به‌وه‌كردووه‌ ڕێككه‌وتنی شه‌نگال دڵخۆشكه‌ر بوو بۆ دانیشتوانی ناوچه‌كه‌ به‌ڵام چه‌كدارانی سه‌ربه‌ پارتی كرێكارانی كوردستان خاڵه‌كانی ڕێككه‌وتنه‌كه‌ جێبه‌جێناكه‌ن و به‌جلوبه‌رگی دیكه‌وه‌ بیندراون و بنكه‌ و باره‌گاكانیان به‌ شێوه‌یه‌كی جیاواز له‌ پێشوو كردووه‌ته‌وه‌.

هه‌ر له‌میانه‌ی لێدوانه‌كه‌یدا مەحما خەلیل باسی له‌وه‌كردووه‌، دانیشتوانی ناوچه‌كه‌ به‌هۆی دڵه‌ڕاوكێ و ترسیان له‌چه‌كدارانی په‌كه‌كه‌ ناتوانن بگه‌ڕێنه‌وه‌ بۆ ماڵه‌كانی خۆیان.

هه‌ر له‌و باره‌یه‌وه‌  قایمقامی شه‌نگال داواشیكردووە، به‌زووترین كات چه‌كدارانی په‌كه‌كه‌ ناوچه‌كه‌ چۆڵبكه‌ن بۆ ئه‌وه‌ی ئاواره‌كانی شه‌نگال به‌ئاسووده‌یی بگه‌ڕێنه‌وه‌ بۆ ناوچه‌كانی خۆیان.