سەرۆکی شارەوانی سلێمانی رایگەیاند، شەوی رابردوو هەریەکە لە بەڕێوەبەری ناحیەی بەکرەجۆ و سەرۆکی شاراوەنی راپەڕین دەستگیرکران و پاش لێکۆڵینەوە لەگەڵیان ئازادکران.

توانا کەمال، سەرۆکی شارەوانی سلێمانی لە دیدارێکی تایبەدا لەگەڵ BMC رایگەیاند:" چەند پارچە زەوییەک لە گەڕەکی عەزیزئاوا داگیرکراون و بەشێوەیەکی نایاسایی رووپێوکراون، زانیاریمان لەوباریەوە لەبەردەستدایە و بەو ئاڕاستەیە کار دەکەین کە ئەو زەوییانە بپارێزیرن و بیگەڕێننەوە بۆ دەوڵەت ".

ئاماژەی بەوەشکرد:" لە ماوەی سێ ساڵی رابردوودا حاڵەتەکانی داگیرکردنی زەوی بەشێوەیەکی بەرچاو زیادیکردووە و چەندین نوسراوی فەرمیمان ئاراستەی پارێزگا و لایەنە پەیوەندیدارەکان کرد و سکاڵاشمان لەسەر ئەو سەرپێچیکارانە تۆمارکردووە کە ناسنامەیان ئاشکراکراوە ".

ئەوەشی خستەڕوو:" یەکێک لەو گرفتانەی لەگەڵ دادگا رووبەڕوومان دەبێتەوە ئەوەیە، کاتێک سکاڵایەک تۆمار دەکەین دادگا داوای ناوی سەرپێچیکار و تەواوی ناونیشانیان دەکات، بەڵام هەندێک جار ئێمە ناسنامەی ئەو کەسانەمان بەردەست نەبووە ".

ئەم قسانەی توانا کەمال سەرۆکی شارەوانی سلێمانی لە میانەی چاوپێکەوتنێکی تایبەتدایە لەگەڵ BMC، کە بڕیارە کاتژمێر ١٠:٠٠ ئەمشەو لە پەیجی BMC پەخش بکرێت.