ئەمڕۆ قوباد تاڵەبانی لەگەڵ شاندێكی بەریتانی كۆبووەوە و لەدیدارێکدا ئەگەر و پێشهاتەكانی قۆناغی پاش هەڵبژاردن تاوتوێ كران.
ئەمڕۆ پێنجشەممە، ٢١ی تشرینی یەکەم، قوباد تاڵەبانی، جێگری سەرۆک وەزیرانی هەرێمی کوردستان لەگەڵ مارك برایسن باڵیۆزی بەریتانیا لە عێراق و شاندێكی كونسوڵخانەی بەریتانیا لە هەرێمی كوردستان كۆبووەوە و لەدیدارەکەدا ئەگەر و پێشهاتەكانی قۆناغی پاش هەڵبژاردن تاوتوێ كران، هەردوولا هاوڕابوون لەبارەی پێویستی پاراستنی ئاسایش و ئارامی و دەستەبەركردنی ئاشتی كۆمەڵایەتی لە رێگەی بەشداریكردنی سەرجەم پێكهاتە و رەنگە جیاوازەكان لە حكومەتی داهاتووی عێراقدا.
بەریتانیا رۆڵی زیاتر بگێڕێت لە پاڵپشتیكردنی چاكسازییەكانی هەرێمی كوردستان
لە تەوەرێكی دیکەی كۆبوونەوەكەدا، قوباد تاڵەبانی داوایكرد بەریتانیا رۆڵی زیاتر بگێڕێت لە پاڵپشتیكردنی چاكسازییەكانی هەرێمی كوردستان و لای خۆیەوە هەنگاوە تەكنیكییەكانی حكومەتی هەرێمی كوردستانی روونكردەوە لە بوارەكانی رێكخستنەوەی باج و رسومات لەگەڵ ئەو هەنگاوانەی كە گرنگن بۆ پێشخستنی پرۆسەی حوكمڕانی.
شاندە بەریتانییەكە پابەندی وڵاتەكەیان دووپات كردەوە بە هاوكاریكردنی هێزە ئەمنییە عێراقییەكان لە نێویشیاندا پێشمەرگە بۆ بەرەنگاربوونەوەی مەترسییەكانی سەرهەڵدانەوەی داعش و مەترسییەكانی تیرۆر بە گشتی.
