بەرپرسی میحوەری دووی قەرەتەپە – حەمرینی پیشمەرگە
ئاماژەی بەوەکرد، داعش نەک تەنها مووچە دەدات بە چەکدارەکانی بەڵکو بە
کەسوکاری کوژراوەکانیشی دەدات.
مەردان چاوشین بەرپرسی میحوەری دووی قەرەتەپە – حەمرین
ئاماژەی بەوەکرد:" هێزێکی ٢٠٠ کەسی بەناوی (حراس الدین) لە سوریاوە دزەیان
کردووەتە ناو خاکی عێراق بەیعەتیان بە چەکدارانی داعش داوە".
لە داهاتوودا دەتوانن مەترسی گەورە دروستبکەن
راشیگەیاند:" ئەو هێزە توانیویانە خۆیان لە دیالە و
سەڵاحەدین و کەرکوک بڵاوە پێبکەن و لە داهاتوودا دەتوانن مەترسی گەورە دروستبکەن".
لە بارەی جموجۆڵەکانی داعش لە ناوچەکەشدا وتی:" چەکدارانی
داعش لە قۆناغی خۆ کۆکردنەوەدان و هاوکاری دارایی و لۆجیستیان لە دەرەوەی وڵاتەوە
پێدەگات، زانیاریشمان دەستکەوتووە کە داعش نەک تەنها مووچە بە چەکدارەکانی، بەڵکو بە کەسوکاری کوژراوەکانیشی دەدات".
بەرپرسی میحوەری قەرەتەپە – حەمرین باسی
لەوەشکرد:" ئەو بۆشاییە ئەمنییەی کە لە نێوان سوپای عێراق و هێزی پێشمەرگەدا هەیە بووەتە هۆی زیادبوونی هێرشەکانی داعش ".