لە ڤیدیۆیەکدا کە لە تۆرە کۆمەڵایەتییەکاندا بڵاوبووەتەوە، تێیدا ئەفسەرێکی وەزارەتی ناوخۆی عێراق دەردەکەوێت کە هێرشدەکاتە سەر هاوڵاتییەک و چەکی لێ رادەکێشێت.
لەو بارەیەوە، راگەیاندنی وەزیری ناوخۆی عێراق لە بەیاننامەیەکدا لەبارەی رووداوەکە رایگەیاندووە:" عوسمان غانمی، وەزیری ناوخۆ بڕیاریداوە کە رێوشوێنی یاسایی بەرامبەر ئەو ئەفسەرە بگیردرێتەبەر کە هێرشی کردبووە سەر هاوڵاتییەک لە بەغدای پایتەخت".
پێکهێنانی لیژنەکەی لێکۆڵینەوە لەسەری
ئەوەش هاتووە:" وەزیری ناوخۆ بڕیاریداوە بە راگرتنی کارەکانی ئەو ئەفسەرە و پێکهێنانی لیژنەکەی لێکۆڵینەوە لەسەری".
هەموو هەفتەیەک ٥٠ هەزار دیناری لێوەرگرتووە
لە ڤیدیۆکەدا، بەدەر لە هاوڵاتی و ئەفسەرەکە ژمارەیەک پۆلیس و ئەندامی هێزە ئەمنیەکان دەردەکەون، کە هەوڵدەدەن ئەفسەرەکە کە پلەی نەقیبە هێمن بکەنەوە، هەروەها لە ڤیدیۆکەدا دەبیسترێت کە هاوڵاتییەکە دەڵێت "هاتووە پارەم لێ وەربگرێت، هەموو هەفتەیەک ٥٠ هەزار دینارم لێ وەردەگیردرێت".