ئەمڕۆ قوباد تاڵەبانی جێگری سەرۆکی حکومەتی هەرێم
پێشوازی لە دەیڤد هانت کونسوڵی گشتی بەڕیتانیا لە هەولێر کرد و لە میانەی
کۆبوونەوەیەکیشیاندا، دوایین گۆڕانکارییەکانی سەر گۆڕەپانی سیاسی هەرێمی کوردستان
و عێراقیان تاوتوێ کرد.
ئەمڕۆ دووشەممە ٢٤ی کانوونی دووەم، دەزگای فەرمی یەکێتی
نیشتیمانی کوردستان لە راگەیەندراوێکدا ئاماژەی بەوەکرد:" ئەمرۆ قوباد
تاڵەبانی جێگری سەرۆکی حکومەتی هەرێم پێشوازی لە دەیڤد هانت کونسوڵی گشتی
بەریتانیا لە هەولێر کرد و لە میانەی دیدارەکەشیاندا پرسەکانی گۆڕەپانی سیاسی
هەرێمی کوردستان و عێراقیان تاوتوێ کرد".
ماف و شایستە دەستوورییەکانی هەرێمی کوردستان دەکرێتە پێسەنگی دانوستانەکانی نێوان هەرێم و عێراق
لە راگەیەندراوەکەدا ئەوەشیخستەڕوو:" لە تەوەرێکی
دیکەی دیدارەکەیاندا، پرسی پێکهێنانی حکومەتی نوێی عێراقیان تاوتوێ کردووە و هەروەها
جەختیشیان لەسەر گرنگی یەکڕیزی کورد لە بەغدا کردووەتەوە بەجۆرێک کە ماف و شایستە
دەستوورییەکانی هەرێمی کوردستان بکرێتە پێشەنگی دانوستانەکانیان لەگەڵ حکومەتی
عێراقدا".
راشیگەیاند:" هەردوولا کۆکبوون لەسەر ئەوەی پێویستە
بەگرتنەبەری رێگای دیالۆگ و هەوڵی لێکنزیکردنەوەی بۆچوونی لایەنە سیاسییەکان لە
عێراق بدرێت، بۆ ئەوەی حکومەتی نوێی عێراق حکومەتێکی خزمەتگوزار بێت و خزمەتی
هاوڵاتییانی بکات".
لە دیدارەکەدا جەخت لە پەیوەندییەکانی هەرێمی کوردستان و بەڕیتانیا کراوەتەوە
لە راگەیەندراوەکەدا ئەوەش هاتووە:" لە بارەی
پەیوەندییەکانی نێوان هەرێمی کوردستان و بەڕیتانیاشەوە، هەردوولا جەختیان لە
پەرەپێدانی پەیوەندییەکانی نێوانیان کردوە و ئاماژەشیان بە گرنگی ئەو پەیوەندییە
لە هەموو بوارەکاندا کردووە"