راوێژکارێکی بانکی ناوەندی حکومەتی فیدراڵ رایگەیاند، رێوشوێنەکان بۆ دابەزاندنی نرخی دۆلار گیراوەتەبەر و لە ئایندەیەکی نزیکدا نرخی دۆلار دەگەڕێتەوە نرخی فەرمی خۆی، کە هەزار و ٤٧٠ دینارە بۆ هەر دۆلارێک.
ئیحسان شەمران ڕاوێژكاری بانكی ناوەندی حکومەتی فیدراڵ لە لێدوانێکی رۆژنامەوانیدا ئاماژەی بەوەکردووە:" بانکی ناوەندی دەستیکردووە بە گرتنەبەری رێوشوێنە نوێیەکان بۆ دابەزاندنی نرخی دۆلار لە بەرامبەر دینار و لەو چوارچێوەیەشدا چاوەڕوان دەکرێت لە ئایندەیەکی نزیکدا نرخی دۆلار داببەزێتەوە نرخی فەرمی خۆی، کە هەزار و ٤٧٠ دینارە بۆ هەر دۆلارێک".
ئەوەشی خستووەتەڕوو:" بانكی ناوەندی داوای لەبانكەكانی هاوكاری كردووە ئاسانكاری بۆ رێوشوێنەكانی دانان و حەواڵەكردنی پارەی بازرگانەكان بكەن بۆ دەرەوە, ئەوەش رەنگدانەوەی ئەرێنی دەبێت و ئاسانكاری بۆ پرۆسەی فرۆشتن و حەواڵەكردنی دراوەکان دەكات".
راشیگەیاندووە:" یەدەگی دراوی نەختینەی بانکی ناوەندی ٩٠ ملیار دۆلاری تێپەڕاندووە، کە بەرزترین ئاستە لە ماوەی چەندین ساڵی رابردوودا پێی گەیشتبێت، بەو پێیەش هیچ کێشەیەکی نابێت بۆ خستنەبازاڕی زیاتری دۆلار".