سەرۆکی رەوتی حیکمە ئاشکرایکرد، لەگەڵ بەشێک لە هێزە چەکدارەکانی عێراق رێککەوتن کراوە تاوەکو هێرشی نوێ ئەنجام نەدرێت.
عەمار حەکیم سەرۆکی رەوتی حیکمە لە میانەی بەشداریکردنی لە دیداری سلێمانی رایگەیاند:" ئێران لە خاکی خۆیەوە هێرشەکانی بۆ سەر ئیسرائیل ئەنجامداوە و خۆیشی دەرفەتی بەوەدا ژمارەیەک لە مووشەک و درۆنەکانی بخرێتە خوارەوە".
ئاماژەی بەوەشکرد:" ئەو ژمارە زۆرەی مووشەک و درۆن کە لەلایەن ئێرانەوە ئاڕاستەی ئیسرائیل کران و سووربوونی تاران لەسەر ئەنجامدانی هێرشەکە و بە ئامانجگرتنی چەند ناوچەیەک، جۆرێکە لە وەڵام بەرامبەر هێرشەکەی سەر کونسوڵخانەی ئێران لە دیمەشق".
باسی لەوەشکرد:" ئێمە لەگەڵ ئەوەدانین خاکی عێراق بۆ ئەنجامدانی هێرشی سەربازی بەکاربهێنرێت و بە گفتوگۆکردن لەگەڵ بەشێک لە هێزە چەکدارەکان گەشتووینەتە رێککەوتن بۆ ئەوەی چیدیکە خاکەکەمان بۆ هێرش بەکارنەهێرێت و وڵاتەکەمان تووشی شەرمەزاری نەکرێت".
عەمار حەکیم جەختی لەوەشکردەوە:" عێراق جددییە لەسەر ئەوەی هێزەکانی هاوپەیمانان خاکەکەی بەجێبهێڵن، بەڵام ئەو پرسە یەکێک نییە لە هۆکارەکانی سەردانەکەی سەرۆک وەزیرانی عێراق بۆ ئەمەریکا".