بابەتە سەرەکیەکە: قوباد تاڵەبانی جێگری سەرۆک وەزیرانی هەرێم بەبۆنەی هەڵبژاردنەوەی بە ئەمینداری گشتی یەکگرتو پەیامێک ئاڕاستەی سەڵاحەدین بەهائەدین دەکات.

چی وت: بەڕێز مامۆستا سەلاحەدین بەهائەدین، ئەمینداری گشتیی یەکگرتووی ئیسلامیی کوردستان, بەبۆنەی بەستنی کۆنگرەی نۆیەم و هەڵبژاردنەوەی بەڕێزتان بە ئەمینداری گشتیی یەکگرتووی ئیسلامیی کوردستان، گەرمترین پیرۆزبایی ئاراستەی بەڕێزتان و ئەندامانی کۆنگرە و هەموو ئەندامان و جەماوەری یەکگرتوی ئیسلامیی کوردستان دەکەم.

ئەمەشی وت: هیوادارین دەرئەنجامی بڕیار و پەسندکراوەکانی کۆنگرە ببێتە مایەی بەدەستهێنانی دەستکەوت و سەرکەوتنی گەورەتر بۆ حزبەکەتان.

چی تر: لەم قۆناغە ئاڵۆز و هەستیارەی ناوچەکەدا وڵاتەکەمان پێویستیی بە لێکتێگەیشتن و هاوهەڵوێستی زیاترە لەنێوان لایەنە سیاسییەکاندا بۆ ئەوەی بە کۆدەنگی و بڕیاری ژیرانەوە دەرفەتەکان بقۆزینەوە و مەترسییەکانیش بڕەوێنینەوە.

زیاتر: هەر بۆیە چاوەڕێین یەکگرتووی ئیسلامی لە دوای کۆنگرە رۆڵی گەورەتر و کاریگەرتر ببینێت لە قوڵکردنەوەی گیانی ئاشتەوایی و تەبایی و یەکڕیزی لەناو هەرێمی کوردستان و لەم پێناوەشدا ئێمە ئامادەی هەموو جۆرە هاوکاری و هەماهەنگییەکین.