بەرپرسێکى عێراقى رایگەیاند، بڕیارە لەسەردانەکەى کازمیدا بۆ بەریتانیا، دۆسییەى ئاساییکردنەوەى پەیوەندییەکانى عێراق-ئیسرائیل لەگەڵ مستەفا کازمى تاوتوێ بکرێت.

 میسال ئالوسى سیاسەتمەدارى عێراقى بە ئاژانسى روسیا تودەى راگەیاند، حکومەتى بەریتانیا کار بۆ رازیکردنى دەسەڵاتدارانى عێراق دەکات بە ئاساییکردنەوەى پەیوەندییکانى نێوان بەغدا و تەلئەبیب، بۆ ئەو مەبەستەش بڕیارە لە سەردانەکەى کازمیدا بۆ لەندەنى پایتەختى بەریتانیا، پێشنیارى ئاساییکردنەوەى پەیوەندییەکانى نێوان عێراق و ئیسرائیل بخرێتە بەردەستى مستەفا کازمى.

ئەو سیاسییە عێراقییە ئاماژەى بەوەشکردووە، ژمارەیەکى زۆر لە پەنابەرانى عێراقى لە ئیسرائیل دەژین و پێویستە حکومەتى بەغدا واز لە سیاسەتى دژایەتیکردنى ئەو وڵاتە بهێنێت و چیتر وەک دوژمن لێى نەڕوانێت.

ئەوەش لە کاتێکدایە، لەو زنجیرە سەردانەى مستەفا کازمى سەرۆکوەزیرانى عێراق بۆ وڵاتانى ئەوروپا دەستیپێکردووە، بڕیارە لە کۆتایى ئەم هەفتەیەدا کازمى سەردانى لەندەن بکات.